Endama Fermandariya Giştî ya YPJ’ê Rohilat Efrîn anî ziman ku dîlgirtina Rêberê Gelê Kurd Abdullah Ocalan tê wateya dîlgirtina ziman, çand û nasnameyê û got, “Bi komployê sîstema qirkirinê hate kûrkirin.”
Endama Fermandariya Giştî ya Yekîneyên Parastina Jinê (YPJ) Rohilat Efrîn ji ANF’ê re axivî. Rohilat Efrîn bi bîr xist ku Rêberê Gelê Kurd 25 sal in bi rengekî fîzîkî dîlgirtî ye, lê belê felsefeya wî li cîhanê belav bûye û got, “Êrîşa li ser Rêber Apo êrîşa li dijî her kesên dilê xwe bi Rêber Apo re lê dide, felsefeya wî pejirandine, bi paradîgmaya Rêber Apo xwe bi rêxistin ikrine, yanî êrîşa li dijî nirxên mirovahiyê ye. Sîstemên kapîtalîst, dewletên hegemonîk li pêşiya jiyana gelan a bi deng, çand, ziman û rûmeta xwe dibin asteng. Ya ku li hemberî vê yekê têkoşiya felsefeya Rêber Apo bû.”
‘XWESTIN TÊKOŞÎNA NASNAMEYÊ ASTENG BIKIN’
Rohilat Efrîn anî ziman ku êrîş di heman demê de li hemberî daxwaza aştî û demokrasiyê ya gelê Kurd hate kirin û got, “Bi komploya navneteweyî re xwestin têkoşîna nasname, çand û ziman a gelan asteng bikin, sîstema qirkirinê hate kûrkirin. Komploya navneteweyî komployeke ji bo tunekirina zimanan, qirkirina çandan û înkarkirinê ye.”
‘ŞOREŞA ROJAVA XWE DISPÊRE FELSEFEYA WÎ’
Rohilat Efrîn bal kişand ser nerazîbûnên li hemberî komploya navneteweyî û bi dewamî got, “Her kes û hemû hêzên ku navê Rêber Apo bihîstin, di doza wî de têkoşiyan, serhildanên gel, qîrîna dayikan, yên bedena xwe dan ber agir li cîhanê bûn dengek. Dîlgirtina Rêber Apo weke dîlgirtina nasname, çand û ziman hate nirxandin. Şoreşa Rojava bi felsefeya Rêber Apo gihîşt vê astê. Eger îro em dikarin destketiyên xwe biparêzin, rêxistiniya xwe xurt bikin nabe ku ev yek ji ked û têkoşîna Rêber Apo ya li ser vê xakê cuda bê nirxandin. Têkoşîna 20 salan a Rêber Apo ya li Rojava, bi rêbazeke welê bû ku li ber sîstemê, li ber zilmê serî netewand, sîstem nirxand. Rêber Apo li Rojava hîmê şoreşeke gelekî xurt danî. Ji hestên xurt ên welatparêziyê heta bi birêxistinkirina tevgera jinê, hemû beşên civakê li gorî felsefeya Rêber Apo xwe nirxandin.”
‘YPJ BI PARADÎGMAYA RÊBERTÎ ŞER KIR Û MEZIN BÛ’
Rohilat Efrîn destnîşan kir ku YPJ bi paradîgmaya Rêberê Gelê Kurd xwe bi rêxistin kir, mezin bû, şer kir û got, “YPJ’ê paradîgmaya Rêber Apo, azadiya wî û naskirina xwe, ji xwe re kir bingeh. Eger azadî nebe rêxistinî nabe, eger rêxistinî nebe jiyan nabe, eger jiyan nebe parastin nabe. Di vê çarçoveyê de YPJ’ê bi felsefeya Rêber Apo pîvanên têkoşîn û jiyanê ji xwe re diyar kir. YPJ di têkoşîna dijî dewleta Tirk û DAÎŞ’ê de çavkaniya xwe ya berxwedan û hêza têkoşînê paradîgmaya Rêber Apo ye. Li gel hemû êrîşan eger em îro dikarin destketiyên xwe biparêzin, ev yek pêwendiya xwe bi kûrbûna li ser paradîgmaya Rêber Apo heye.”
‘BI PARÊZNAMEYÊN XWE KOMPLO TÊK BIR’
Rohilat Efrîn bi dewamî bal kişand ser tecrîda giran a li ser Rêberê Gelê Kurd Abdullah Ocalan û got, “Şert û mercên giran ên tecrîdê ji ber tirsa hêzên hegemonîk û dagirker a ji ber belavbûna gotineke bi tenê ya Rêber Apo ye.” Rohilat Efrîn got, “Ragirtina Rêber Apo bi salan li zindana Îmraliyê, astengkirina hevdîtina bi parêzer û malbata wî re, ji ber tirsa ji hêza paradîgmaya wî ye. Lewma di şexsê Rêber Apo de zêdeyî 40 milyon mirov, ziman, çand û nasnameya gelekî tê tecrîdkirin.”
‘GEL DAXWAZA AZADÎ Û DEMOKRASIYÊ DIKE’
Endama Fermandariya Giştî ya YPJ’ê Rohilat Efrîn girîngiya pêngava ‘Azadî ji Abdullah Ocalan re, çareserî ji pirsgirêka Kurd re’ destnîşan kir û diyar kir ku gel bi dengekî bilind daxwaza azadî û demokrasiyê dike û got, “Jin pêşengiyê ji vê yekê re dikin. Jin di şexsê Rêber Apo de gihîştin azadiya xwe, rizgariya xwe dîtin. Ji meşan heta bi berxwedana li zindanan û grevên birçîbûnê, ji bo şikandina tecrîda li ser Rêber Apo têkoşîneke bêeman tê meşandin. Ne tenê gelê Kurd, her kesên ku di bin zext, zilm û dagirkeriyê de ne, her eksên ku xwe di nava têkoşîna Rêber Apo de dibînin, xwedî li Rêber Apo derketin.”
