Piştî şehadeta şehîd Sîpan (Samî Şêxmûs Hiso) li tevahî Rojavayê Kurdistanê dest bi çalakiyên protestoyê hate kirin. Li bajarê Kobanê jî duh bi şev bi hezaran kes li hemberî wê yekê rabûn û daketin qadan.
Li qada Jina Azad a bajêr bi hezaran ciwan kom bûn û li wir bi dirûşmeya “Şehîd namirin”, bang kirin. Grupek jî xwestin ku tevlîheviyê derbixin û ew tevlîhevî veguherî aloziyekê. Ew alozî hişt ku qedexekirin destpê bikin û Hêzê Ewlekariya Hundirîn di nava bajêr de belav bûn.
Heta berbanga sibehê Hêzên Ewlekariya Hundirîn di nava kolanên Kobanê de belav bûn û rewş sakîn bû.
Di berbanga vê sibehê de di demjimêr 02.00’an de şewatek li zindana Kobanê derket, hejmarek ji girtiyan jiyana xwe ji dest dan û hin jî ji ber dûmana şewatê sewqî nexweşxaneyê hatin kirin. Girtiyên ku ji ber dûmanê birîndar bûne sewqî nexweşxaneyên li Kobanê hatine kirin, heta niha sedema derketina şewatê ne diyar e, aliyên peywendîdar jî bûyerê lêpirsîn dikin.
Birîndarê bi navê Ezîz Ebdulseîd Adil dibêje ku duh ew jî di bûyera şewata zindanê de şewitî û got: “Ewlekariya giştî dema derbasî bajarê Kobanê bû, gotin ku em ê we bibin Helebê, me jî weke protestokirinê agir berda xwe. Ewlekariya giştî ji bo wan çalakvanên ku duh girtine jî got, em ê wan jî bibin. Me jî agir berda xwe, betaniyên xwe me rakirin û me agir berda betaniyên xwe û me agir bi xwe xistin.”
Her wiha têkildarî bûyerê hate ragihandin ku şeva borî, karwanekî Hêzên Ewlekariya Hundirîn ji Helebê gihîşt Kobanê û li kolanan geriya. Wan bi awayekî kêfî sivîl girtin û di heman demê de heqaret, gotinên neexlaqî û nijadperestane li xelkê herêmê kirin. Piştre, komek girtiyan li hundirê navendê çalakiyeke protestoyî li dar xistin û di odeyên razanê de agir pê xistin. Ew li dijî hewldana Hêzên Ewlekariya Hundirîn a bi serokatiya Kolonel Mecdeddîn El-Şêx, derketin ku dixwestin wan bi zorê ji girtîgeha bajêr veguhezin cihekî li derveyî bajêr. Di encama vê bûyerê de 9 girtî jiyana xwe ji dest dan û hejmareke mezin a girtiyên din jî ji ber dûmanê bandor bûn.
