Erkdarê Fermandariya Cendermeyan a Navçeyê çawişê pispor Alper Kaan Polatkan ê ku di 8’ê Hezîrana 2023’yan de li navçeya Gever a Colemêrgê bi wesayita xwe Erdem Aşkan ê 5 salî qetil kir, bê ceza hate hiştin.
Wesayita ku ji navçeyê ber bi bajarê Wanê ve bi lezeke zêde diçû, li Erdem Akan ê 5 salî yê destê dayika xwe girtî qelibî. Aşkan li cihê bûyerê jiyana xwe ji dest da û çawişê pispor ê kujer jî çek kişand gelê ku li cihê bûyerê nerazîbûnên xwe nîşan da û ji cihê bûyerê reviya.
Encama doza têkildarî bûyerê piştî du salan eşkere bû û ji çawişê pispor ê kujer re bi sucdariya ‘’bi zanebûnî bûye sedema mirinê’’ salek û 8 meh cezayê girtîgehê hate birîn. Dadgehê biryar da ku biryara xwe piştre eşkere bike û kujer bê ceza hişt.
ERDEM 50 METREYAN LI ERDÊ KAŞ BÛ
Çawişê pispor ê piştî bûyerê reviyabû nuqteya polîsan a kontrolê, îdîa kiribû ku girseya gel a li cihê bûyerê êrîşî wî kiriye û Erdem Aşkan li cihê bûyerê hiştibû. Kujer piştre hatibû binçavkirin û ew biribûn Navenda Polîsan a Geverê.
Têkildarî bûyerê ji aliyê Serdozgeriya Komarê ya Geverê ve lêpirsîn hatibû destpêkirin; dozgeriyê li gorî zabitnameya li cihê bûyerê Aşkan di qezayê de weke biqusûrê eslî dîtibû. Çawişê pispor jî piştî standina îfadeyê bi şertê kontrola edlî hatibû berdan.
ERDEM HATE QETILKIRIN, PÊŞEROJA KUJER GIRÎNG HATE DÎTIN
Piştî darizandinê dadgehê 2 sal cezayê girtîgehê li kujer birî. Piştre bandorên cezayê yên li ser pêşeroja kujer li ber çavan hate girtin û dadgehê ceza daxist salek û 8 mehan.
Tevî van yekan hemûyan jî dadgehê nebûna qeyda sicîl a edlî û rewşa wî ya di rûniştinê de weke hincet nîşan dan û biryar da ku biryara xwe piştre eşkere bike û kujer bê ceza hişt.
