Malbateke ji koçberên Serêkaniyê ragihand ku kurê wan Cûma Ehmed El Izo û 3 sivîlên dîtir dema ku çûne serdana Serêkaniyê, ji aliyê çeteyên “Polîsên Leşkerî” yên li bajarê Serêkaniyê ve hatine girtin.
Cûma El Izo ji gundê Menacîr ê Serêkaniyê ye, Mehmûd Hobo û kurê wî Welat Hobo ji bajarê Til Temir in û Ehmed Qasim El Ewed jî ji Serêkaniyê ye.
Malbata El Izo anî ziman ku ew dema çûne serdana Serêkaniyê û gundên wan, kurê wan û kesên ku pê re nêzî gundê El Aliye yê Serêkaniyê hatine girtin.
Her wiha malbata El Izo diyar kir ku kurê wan û hevalên wî ji aliyê çeteyên Polîsên Leşkerî yên Serêkaniyê ve hatine girtin û radestî îstîxbarata Tirkiyeyê kirine.
Malbatê da zanîn ku her çar sivîl derbasî Tirkiyeyê kirine û aqûbeta wan ne diyar e.
Malbata Cûma Ehmed El Izo û sivîlên dîtir nikarin xwe bigihînin zarokên xwe û tu agahî li ser rewşa wan negirtine.
Li gorî qanûnên navneteweyî û bi taybet Peymanên Cinêvê nabe ku welatiyên Sûriyeyê bigirin û bibin Tirkiyeyê.
