Hevdîtinên gel ên Partiya Herêman a Demokratîk (DBP) û Partiya Demokrasî û Wekheviyê ya Gelan (DEM Partî) dewam dikin ku bi dirûşma ‘Hevdîtinên ji bo azadî û aştiya civakî’ têne lidarxistin.
Li Mêrdînê hevdîtina gel hate lidarxistin. Nûnerên partiyên siyasî û rêxistinên civakî yên sivîl jî beşdarî hevdîtinê bûn.
Hevseroka Giştî ya DBP’ê Çîgdem Kiliçgun Ûçar anî ziman kug elê Kurd nîqaşê li ser mafên xwe, paşeroja xwe dike û got, “Di rewşa heyî de em di demeke gelekî cuda û krîtîk de ne. (…) Aştiyeke bi rûmet, mayinde û demokratîk a pirsgirêka Kurd ne pêvajoyeke welê ye ku tenê li Meclîsê li kursiyê bê axaftin û daxwaz bê kirin. Li cîhanê gelek tecrûbeyên bi vî rengî hene, li gelek welatan di encama kedeke cidî de aştî û çareserî hate afirandin.”
Çîgdem Kiliçgun Ûçar ragihand ku li Bakur û Rojhilatê Sûriyeyê û li Rojava modeleke mînak a ji tevahiya cîhanê re hatiye afirandin û bal kişand ser hevdîtina Tirkiyeyê ya bi lîderê HTŞ’ê Ahmet Şara re bê kirin ûg ot, “Gelo li pêşiya bangkirina li Fermandarê Hêzên Sûriyeya Demokratîk Mazlûm Ebdî çi astengî heye? Ti astengî nîne. Lewma pêwîstî pê heye ku pirsgirêka Kurd, meseleya Kurd bi rengekî esasî bê axaftin. Kî wê bi esasî biaxive? Partiyên siyasî yên li Meclîsê wê destpêkê biaxivin. Ev ne pêvajoyeke welê ye ku tenê ji desthilatdariyê re bê hiştin.”
Çîgdem Kiliçgun Ûçar got, “Li Kurdistanê hiqûqeke cuda, hiqûqa şerê taybet, rejîma tecrîdê, rejîma qeyûm veguheriye siyaseta sereke” û destnîşan kir ku dewlet neçar maye Îmraliyê weke navnîşan ji xwe re bibîne. Çîgdem Kiliçgun Ûçar got, “Sernavê ku îro pêwîstî pê heye ew sernav e ku pêwîstiya Tirkiyeyê 100 sal in pê heye. Wê demê çima Birêz Ocalan 26 sal in tecrîdkirî ye? 26 sal in çima çav û guh li aştiyê hatiye girtin? Û îro çima tenê ji wî hêvî û bendewarî tê kirin? Ji ber ku pirsgirêka Kurd pirsgirêkeke dîrokî ye. Yek ji wan pirsgirêkan e ku di paşeroja vî welatî de li cihekî herî krîtîk e. Belê, divê êdî çareser bibe. Partiyên siyasî, rewşenbîr, nivîskar û her kesên ku dixwazin li vî welatî paşerojeke ronî hebe divê gotina xwe, pratîka xwe hebe.”
Çîgdem Kiliçgun Ûçar destnîşan kir ku wê li ser wê yekê nîqaşan bikin vê daxwaza azadî, demokrasî û aştiyê çawa dikarin mezin bikin, destê Rêber Apo çawa dikarin xurt bikin.
ERZÎROM
Li Erzîromê jî hevdîtin li avahiya DEM Partiyê ya bajêr pêk hat. Ji Meclîsa Jinê ya DEM Partiyê Şîrvan Goçer û ji Desteya Rêveberiya Navendî ya DEM Partiyê Necmettîn Basçi, hevşaredarên Tatos, Qereyazî û Qereçobanê yên DEM Partiyê, endamên meclîsa şaredariyan û gelek kes tevlî bûn.
Alîkarê Hevserokên Giştî yên DEM Partiyê Mahfûz Guleryuz axivî û anî ziman ku bi berxwedana gelê Kurd re tecrîda li ser Rêber Apo derbasî qonaxeke nû bûye û got, “Di pêvajoya dîrokî de careke din bi Birêz Ocalan re meyla destpêkirina pêvajoya aştî û danûstandinan hatiye nîşandan. Em ji vê pêvajoyê re nabêjin pêvajoya aştî yan jî danûstandinan, lê em dikarin bibêjin ku li ber pêvajoyeke nû ne. Sedema herî bingehîn a destpêkirina vê pêvajoyê berxwedana gelê me ye. Li aliyê din jî lêgerînên nû û guherînên li erdnîgariya Rojhilata Navîn e.”
