Êrîşên ku bi destê çeteyên HTŞ’ê û çeteyên bi ser dewleta Tirk ve li Bakur-Rojhilatê Sûriyê hatin kirin, ji aliyê Rêber Apo ve weke berdewam û dûbarekirina Komploya Navnetewî ya 15’ê Sibatê hate nirxandin. Ev êrîş di heman demê de li dijî pergala xweseriya demokratîk bû ku xwe dispêre fikrê netewaya demokratîk a Rêber Apo. Hevseroka Meclîsa Xweseriya Demokratîk a Şengalê (MXDŞ) Cîhan Celo derbarê êrîşên qirkirinê û xeteriyên li ser Şengalê ji ajansa me ANF’ê rer axivî û diyar kir ku ruxmê hemû êrîşan, fikre netewa demokratîk di nav gelan de bicih bûye û têk neçûye.
Cîhan Celo destnîşankir ku rewşa li Rojhilata Navîn ji bo hemû gelên herêmê rewşeke awarte derxistiye holê û vê rewşê wiha şîrove kir: “Ev rewş bi taybet ji bo pêkhateyên ku di aliyê çand, ziman û baweriyê de cudabûna wan heye, ji pergala dewletê dûr in xuya ye. Niha li Sûriyê siyaseta Îslama radîkal herî zêde li ser gelê Kurd, Durzî û Elewî tê ferzkirin. Piştî komkujiya li ser Durzî û Elewiyan, komkujî li ser Kurdên Rojavayê Kurdistanê pêkanîn.”
‘ÊRÎŞ LI SER FIKRÊ NETEWAYA DEMOKRATÎK A RÊBER APO YE’
Cîhan Celo diyarkir ku hikumeta demkî ya li Sûriyê, ji aliyê dewletên ku ew kirine desthilatdar tê rêvebirin û êrîşên li ser Bakur-Rojhilatê Sûriyê wiha nirxand: “Bi komkujiya ku li ser gelê Kurd hate meşandin, xiyaneta ku li pergaala netewaya demokratîk hatiye kirin, dixwazin dîsa komploya li ser Rêber Apo berdewam bikin. Rêber Apo xwest bi fikrê netewaya demokratîk şer li cîhanê bisekinîne, ne ji bo newtewek ji bo herkesi vê tiştê xwest. Lê ji ber xiyanet û komployê, şervanên Kurd neçar man û vekişiyan herêmên Kurdan. Êrîşên li ser fikrê netewaya demokratîk, berdewama komploya li ser Rêber Apo ye. Rêber Apo xistin zindanê, lê her wiha pergala Rêber Apo ya li ser esasê pêkvejiyanê jî hewl dan têk bibin. Lê xayintiya ku hate kirin nayê wateya ku pergala netewaya demokratîk têk çûye. Gelên herêmê car din xwe li dora şervanên YPG û YPJ’ê kirin yek û gotin em axa xwe bernadin.”
‘WÊ HEWL BIDIN HEYFA TÊKÇÛNA DAIŞ’Ê JI ŞENGALÊ HILÎNIN’
Hevseroka MXDŞ’ê Cîhan Celo bibîrxist ku di encama hevdîtinan de niha şer kêm bûye, lê xeterî hê berdewam e û got: “Hin jî çeteyên DAIŞ’ê li derve hene, hewldanên xwe rêxistinkirina DAIŞ’ê heye. Ew xeterî ne tenê li ser Rojava û Sûriyê ye, li ser dewleta Iraqê jî xeterî heye, li ser Şengalê xeterî heye. Çawa xwestin heyfa xwe ya 2014’an ji Kobanê hilînin, wê hewl bidin li Şengalê jî tola xwe rakin. Ji ber ku bajarê yekem ku DAIŞ şikest Şengal bû.”
Cîhan Celo balê kişand ser xeteriyên li ser Şengalê jî û ev bang li civaka Êzidî kir: “Ya herî girîng, divê civaka me pişta xwe bi tu hêzan germ neke. Divê dîroka 2014’an dubare nebe, ji bo vê jî divê civaka Êzidî li dora hêzên xwe yên parastinê kom bibin û amadekariya xwe bikin. Zarokên vê axê dikarin Şengalê biparêzin, ne hêzek ji derve.”
‘LI SER ŞENGALÊ XETERÎ HEYE, SEFERBERÎ PÊWÎST E’
Hevseroka MXDŞ’ê Cîhan Celo anî ziman ku wê dewleta Iraqê di êrîşeke muxtemel de parastina Şengalê neke û wiha berdewam kir: “Derdê Iraqê ne civaka Êzidî ye, derdê wan siyaseta xwe biparêzin. Li ser civaka Êzidî hê jî xeterî heye. Li Iraqê heya niha serokomar nehatiye hilbijartin, ev nîşaneya aloziyeke mezin e. Ji bo Şengalê lazim e rewşa awarte were îlankirin, encax ev civak dikare axa xwe biparêze. Çawa ku li Rojavayê Kurdistanê gel kete nav seferberiyê, axa xwe parast û xwedî li şervanên xwe derket, pêwîst e li Şengalê jî seferberi were îlankirin.”
