Rojnameger Nazim Daştan û Cîhan Bîlgîn di 19’ê Kanûna 2024’an ji hêla Tirkiyeyê ve li Bendava Tişrînê ya Bakur û Rojhilatê Sûriyeyê bi SÎHA’yan hatin qetilkirin. Di 21’ê Kanûna 2024’an de jî komeke rojnamegeran xwestin li Qada Şîşhaneyê ya Stenbolê qetilkirina rojnamegeran protesto bikin. Polîsan êrîşî rojnamegeran kir û 10 rojnameger û 4 siyasetmedar binçav kiribûn. Der barê 10 rojnameger, 2 siyasetmedar û 2 ciwanan de doz hatibû vekirin. Danişîna duyemîn a dozê li 24’emîn Dadgeha Cezayên Giran a Stenbolê ya li Edliyeya Çaglayanê hate lidarxistin.
Rojnameger û siyasetmedar tevlî danişînê nebûn. Parêzerên rojnamegeran di danişînê de amade bûn. Danişîn tenê sê deqeyan berdewam kir. Şandeya dadgehê biryar da ku qedexeya derketina derveyî welat a rojnamegeran bidome û bi hinceta ku şahid tev li nebûne, danişîna dozê taloqî 10’ê Tîrmehê kir
Rojnameger Gulistan Dursun, Hayrî Tunç, Enes Sezgîn, Osman Akin, Can Papîla, Pinar Gayip, Serpîl Unal, welatî Îmam Şenol û Haci Ugîş bi îdiaya “propgandaya rêxistinê” û “muxalefeta li dijî qanûna meş, xwepêşandan û civînan” tên darizandin.
Rojnameger Zeynep Kuray, Yadîgar Aygun, Mahsûm Saglam û welatiyên bi navên Pelîn Laçîn û Yagmûr Filîz jî bi îdiaya “muxalefeta li dijî qanûna meş, xwepêşandan û civînan” tên darizandin. Şandeya dadgehê yên ku tenê bi îdiaya “muxalefeta li dijî qanûna meş, xwepêşandan û civînan” tên darizandin, bi biryara “bêwezîfetiyê” doza wan şandibû Dadgeha Esliyeyê.
