Dayika Aştiyê Sakîne Arat ku salên dûr û dirêj ked da têkoşîna azadiyê ya Kurd, doh li Amedê li nexweşxaneya lê dihate dermankirin jiyana xwe ji dest da. Sakîne Arat li ser wasiyeta xwe li Goristana Yenîkoy a navçeya Rezan a Amedê hate veşartin. Li gel Dayikên Aştiyê, Hevseroka Giştî ya Partiya Herêman a Demokratîk (DBP) Çîgdem Kiliçgun Ûçar, parlamenterên Partiya Demokrasî û Wekheviyê ya Gelan (DEM Partî), nûnerên partiyên siyasî û rêxistinên civakî yên sivîl ên li bajêr tevlî merasîmê bûn.
Dayikên Aştiyê darbesta Sakîne Arat li ber dirûşma ‘Şehîd namirin’ birin goristanê. Dayika Aştiyê Muruvet Demîr li merasîmê axivî û got, “Daxwaza dayikê her tim aştî bû. Hesreta wê yekê di dilê wê de ma. Dilê me şewitî, bila hîn bêhtir dilê mirovan neşewite. Oxir be ji te re dayê, oxir be.”
Dayika Aştiyê Nezahat Teke jî got, “Hêviya aştiyê dida me” û diyar kir ku wê têkoşîna wê dewam bikin.
Ji bo Sakîne Arat li Mala Şînê ya Odabaşi Bal şîn hate danîn.
