Rêxistina Partiya Demokrasî û Wekheviyê ya Gelan (DEM Partî) ya Stenbolê têkildarî 1’ê Gulanê Cejna Karkeran a Cîhanê bi dirûşma “Ji bo ked, aştî û edaletê em bi hev re biçin 1’ê Gulanê” daxuyanî da. Daxuyanî, li avahiya partiyê hat lidarxistin û pankarta “Ji bo ked, aştî û edaletê em bi hev re biçin 1’ê Gulanê” hate hilgirtin. Nûnerên partiyên siyasî, rêxistinên jinan û sendîkayan tev li bûn.
Ji Partiya Jinûveavakirina Sosyalîst (SYKP) Alî Genç ji ewil axivî û got ku dê di 1’ê Gulanê de daxwazên xwe bînin ziman. Genç, diyar kir ku divê di Pêvajoya Aştî û Civaka Demokratîk de gav bên avêtin û ji bo daxwazên hemû karkeran bînin ziman jî dê têkoşîna xwe bidomînin.
Nûnerê Platforma Piştevaniya Sosyalîst (SODAP) Mûstafa Ozturk jî banga tevlibûna qadên 1’ê Gulanê li her kesî kir.
Hevseroka DEM Partiyê ya Stenbolê Arîfe Çinarê jî diyar kir ku di pêvajoyeke xizanî zêde bûye de 1’ê Gulanê pêşwazî dikin û ev tişt anî ziman: “Dê têkoşîna me ya li dijî vê bidome. Li dijî bêtemînatiyê û ji bo aştî û civaka demokratîk em ê dengê xwe bilind bikin. Em tax bi tax, li hemû park û foruman bi karkeran re hevdîtinan dikin û banga tevlibûna 1’ê Gulanê dikin. Em li bendê ne gelên me bi ruhê Newrozê biherikin Kadikoyê.”
Piştre jî metna hevpar ji hêla Hevberdevkê Komîsyona Bajar a Stenbolê ya DEM Partiyê Seyfettîn Gulenyuz xwend. Gulenyuz, diyar kir ku ew ê di 1’ê Gulanê de li Kadikoyê bin û got ku ji şer herî zêde karker û kedkar bibandor dibin.
Di berdewamê de Gulenyuz anî ziman ku aştî ji bo karker û kedkaran biqasî nan û avê pêwîst e û got: “Di pêvajoya heyî de hesreta me ya ji bo welatekî wekhev, azad û demokratîk mezin dibe. Ji bo daxwazên me yên jiyanî çêbibin û ji bo verasetkirinên îdarî dê têkoşîna xwe mezin bikin. Ji bo van mafan jî em xwe ji bo 1’ê Gulanê amade dikin.”
Bi domdarî Gulenyuz şerê li Rojhilata Navîn bi bîr xist, diyar kir ku hêza kirînê kêm bûye, şertê jiyaneke insanî zehmet bûne û axaftina xwe bi vê bangê qedand: “Em bibiryar in ku têkoşîna xwe ya ked û aştiyê mezin bikin. Ne xizanî ne şer, ji bo aştî û civaka demokratîk em xwe ji 1’ê Gulanê re amade dikin. Em ê li dijî kêmtirîn mûçeyê, bêkarî, pergala mêrê serdest, ji bo keda jinê, ji bo karkerên astengdar û li dijî talankirina xwezayê li qadê bin. Hesreta gelê Kurd a ji bo aştiyê her ku diçe zêde dibe lê ji bo çareseriyê tu gav nayên avêtin. Ji bo ji zilmê re bibêjin bes e em ê li qadên 1’ê Gulanê bin. Em bang li her kesî dikin ku tev li 1’ê Gulanê bibin.”
