Êrîşên çeteyên Heyet Tehrîr El Şam (HTŞ) bi navê xwe yê berê El Nûsra yên li ser Heleb û derdora wê dewam dikin. Piştî destpêkirina êrîşa çeteyan beşeke mezin a bajarê Helebê û bajarên derdorê kete destê çeteyan. Hikumeta Şamê bêyî ku li hemberî çeteyan li ber xwe bide xwe ji herêmê vekişand. Demhat Tolhildan ku têkildarî êrîşan li herêmê rojnamevaniyê dike, ji ajansa me re axivî.
‘ÇETE LI BERXWEDANÊ RAST NEHATIN’
Tolhildan anî ziman ku çete ji Hama heta bi Derayê li qadeke berfireh belav bûn û got, “Hêzeke ku li hemberî wan li ber xwe ebin nîne. Hêzên rejîmê û Rûsya li her derê qad ji çeteyan re hiştin.” Tolhildan diyar kir ku çeteyan bi amadekariyeke mezin êrîş kirin û got, bi êrîşê re hucreyên çeteyan ên razayî yên li herêmên di bin kontrola hêzên hikumeta Şamê de ne, ketin nava liv û tevgerê.
‘KURD DERBASÎ POZÎSYONA XWEPARASTINÊ BÛN’
Tolhildan têkildarî taxên Helebê yên ku Kurd lê ne, agahî da û diyar kir ku Kurdan sîstema xwe parastin, ketin pozîsyona xweparastinê û got, “Çeteyan hewl dan êrîş bikin, lê belê bi xweparastina gel êrîş hatin têkbirin.” Tolhildan anî ziman ku ji bilî van êrîşan êrîşeke din nebû û got, çeteyan li xeta Şehba û El Babê êrîş kirin, li Helebê ji bilî herêmên Kurd lê ne hemû herêm kete destê çeteyan.
‘DEWLETA TIRK LI BERPIRSYARIYA XWE MIKUR HAT’
Tolhildan ragihand, mirovên ku ji çeteyan ditirsin xwe li taxên Kurdan û herêmên Rêveberiya Xweser girtin û destnîşan kir ku ji ber cudahiya mezhebî ev mirov nikarin li herêmên di bin kontrola çeteyan de ne bimînin. Demhat Tolhildan diyar kir ku dewleta Tirk bi rengekî ne yekser berpirsyariya êrîşan li xwe girt û bi bîr xist ku dewleta Tirk bi gotina ‘Eger Sûriye xwe nede ber çareseriyê wê herêm hîn tevlîhev bibe’ gefa êrîşan xwariye. Tolhildan bal kişand ser çekên çeteyan û diyar kir ku çete ji aliyê dewleta Tirk ve hatin perwerdekirin û got, ji sîstema termal a şevê heta bi balafirên xwekujî, eşkere ye ku ji aliyê dewleta Tirk ve hatine perwerdekirin.
‘ÇETE JI ALIYÊ MÎT’Ê VE HATIN PERWERDEKIRIN’
Her wiha ragihand ku çete ji aliyê MÎT’ê ve hatine perwerdekirin û got, “Ji tîma ku droneyên xwekuji bi kar tînin re dibêjin ‘Koma Şahîn’, lê belê di Erebî de peyveke Şahîn nîne. Diyar e ku dewleta Tirk ev nav li wan kiriye. Her wiha normal çete li êrîşên bi vî rengî navê Îslamî lê dikin, lê belê navê van êrîşan Îslamî jî nîne. Diyar e ku hemû plan ji aliyê dewleta Tirk ve hatiye kirin û ev plan li pêşiya çeteyan hatiye danîn. Her wiha eger li pişt van çeteyan hêzek nebûya êrîşî ti cihî nedikirin. Diyar e ku dewleta Tirk hevsengiyên hatin guhertin weke firsend dîtin û êrîş pêk anî.”
‘TIRKIYE ÇETEYAN J BO PLANÊN XWE BI KAR TÎNE’
Tolhildan anî ziman ku êrîş ji NATO û DYE’yê cuda nîne û bal kişand ser daxuyaniya DYE’yê ku li ya Tirkiyeyê tê. Demhat Tolhildan diyar kir ku dewleta Tirk bi wezîfeya NATO’yê serkêşiyê ji van çeteyan re dike û got, “Wezîfeya kontrolkirina komên cîhadîst û wergirtina koçberên Sûriyeyê ji Tirkiyeyê re hatibû dayin, lê belê Tirkiye hem wezîfeya NATO’yê pêk tîne hem jî li gorî planên xwe van çeteyan bi kar tîne.”
‘ÊRÎŞ JI DYE Û NATO’YÊ CUDA NÎNE’
Demhat Tolhildan şîroveya wê yekê kir ku DYE ji bo berjewendiyên xwe, ji ber lawaziya Rûsyayê ya li herêmê dibe ku rê dabe êrîşeke bi vî rengî û destnîşan kir ku dibe ku ji bo ‘ewlekariya’ Îsraîlê êrîşeke bi vî rengî hatibe kirin.
‘TIRKIYE JI LAWAZBÛNA RÛSYA Û ÎRANÊ SÛDÊ WERDIGIRE’
Tolhildan anî ziman ku Rûsya û Îran hem di şerê herêmî hem jî di şerê Rûsya-Ûkraynayê de lawaz bûne û got, “Rûsyayê beşeke mezin a hêza xwe ya teknîkê ber bi Ûkraynayê ve kişand, li vê derê lawaz bû. Her wiha di şerê herêmî de jî Îranê zerareke cidî dît.” Tolhildan destnîşan kir ku Îran û Rûsya wê ji dest vê herêmê bernedin û dixwazin bi rengekî dest lê werde, lê belê ji ber lawaziyê nikarin dest lê werdin.
‘YÊN KU BERÊ DAÎŞ’Ê DAYÎN KURDAN, WÊ HEMAN TIŞTÊ BIKIN’
Demhat Tolhildan gefên li ser Kurdan ên li herêmê bibîr xist û got, dewleta Tirk dixwaze berê êrîşên çeteyan bide Kurdan. Tolhildan bal kişand ser êrîşên DAÎŞ’ê yên li hemberî Kurdan û ev hişyarî kir: “Di sala 2014’an de hatibû gotin ku DAÎŞ wê êrîşî Şamê bike. Lê belê, berê çeteyan dan Kurdan. Weke dîrokî ev wiha ye, yên ku berê DAÎŞ’ê dayîn Kurdaan, wê niha jî berê çeteyan bidin Kurdan. Yên ku dibêjin çete wê êrîşî Kurdan nekin, xwe dixapînin. Her ji niha ve êrîşî birin ser Til Rifat û gelê Ereb ê ku jiyana hevpar a bi Kurdan re esas girtine. Dewleta Tirk ji bo ku vê yekê ji xwe re bike avantaj, wê berê êrîşan bide ser herêmên ku Kurd lê dijîn.”
‘RÊYA PARASTINA ŞOREŞÊ, BERXWEDAN E’
Tolhildan, Şoreşa Rojava ya ku têkoşîna hevpar a gelan afirandî bi bîr xist û destnîşan kir ku xeterî heman e û divê bi heman rengî berxwedan were raberkirin. Tolhildan diyar kir ku bi sîstemeke li ser esasê netewa demokratîk, wê pirsgirêkên herêmê bên çareserkirin û ev tişt anî ziman, “Berxwedan ji bo Kurdan, wê ruhê neteweyî jî xurt bike. Li dijî êrîşên komên çeteyan, divê bi ruhê seferberiyê berxwedan bê raberkirin. Yekane rêya parastina destkeftiyên Şoreşa Rojava, berxwedana bi ruhê seferberiyê ye.”
