Li bajarên Tirkiye û Kurdistanê di çarçoveya 1’ê Îlonê Roja Aştiyê ya Cîhanê de çalakî hatin lidarxistin. Li Êlihê bi pêşengiya Tevgera Jinên Azad (TJA) “Zincîra Aştiyê” hate çêkirin û li Amedê jî “Kursiya Aştiyê” hat danîn.
AMED
Tevgera Jinên Azad (TJA) bi boneya 1’ê Îlonê Roja Aştiyê ya Cîhanê li ber Yek Derî ya navçeya Sûr a Amedê “Kursiya Aştiyê” danî. Pankarta “Jin, Jiyan, Azadî” li sûrê hate daleqandin û dowîzên bi Kurdî û Tirkî yên daxwaza aştiyê dikin, hatin hilgirtin.
Çalakvana TJA’yê Ayla Akat Ata, parlementerên DEM Partiyê Adalet Kaya û Sumeyye Boz, gelek jin, rêxistinên civaka sivîl û nûnerên partiyên siyasî tevlî çalakiyê bûn. Jinan bi cil û bergên xwe yên neteweyî govendê gerandin û dirûşmeya “Jin, Jiyan, Azadî” berz kirin.
Jinên ku di çalakiyê de mafê axaftinê girtin, destnîşankirin ku aştî wê bi tevlîbûna jinan dikare were mayîndekirin û bal kişandin ser azadiya fîzîkî ya Rêber Apo.
Jinan xwestin ku jin azad bibin û neyên qetilkirn û destnîşankirin ku ew ê dev ji aştî û mafên xwe bernedin.
Jinan diyarkirin ku ew di hawirdorekî bêyî şer û şert û mercên wekhev de dixwazin jiyan bikin û gotin ku divê zemîna qanûnî ya Pêvajoya Aştî û Civaka Demokratîk ku bi pêşengiya Rêber Apo hate destpêkirin, were avakirin.
Jinan bertek nîşanî zext û astengiyên li hemberî zimanê Kurdî jî dan û destnîşankirin ku divê her kes bi zimanê xwe jiyan bike.
ÊLIH
Jinên ku bi pêşengiya TJA’yê li pêşiya avahiya DEM Partiyê ya bajêr li hev civiyan, heta Parka Yilmaz Guney bi çêkirina “Zincîra Aştiyê” meşiyan. Di meşê de pankarta “Me hebûna xwe bi dest xist, ji bo azadiya xwe têdikoşin” hate vekirin û dirûşmeyên “Ji şer re na, tavile aştî”, “Jin, Jiyan, Azadî” hate berzkirin.
Jinên ku li Parkê axivîn, îşaret bi Pêvajoya Aştî û Civaka Demokratîk kirin û destnîşankirin ku azadiya fîzîkî ya Rêber Apo ji bo aştiyê şert e.
WAN: BANGA MEŞ Û PANELÊ
Platforma Ked û Demokrasiyê ya Wanê beriya meş û panela ku ji bo Roja Aştiyê ya Cîhanê were lidarxistin, belavok belav kir.
Li ser navê Platformê Mûrat Atabay axivî û ragihand ku di 2’ê Îlonê de li Baroya Wanê Panel, di 3’ê Îlonê de jî li Parka Aştiyê ya Mûsa Enter meş were lidarxistin.
ÎZMÎR
Platforma Ked û Demokrasiyê ya Karşiyakayê bi boneya Roja Aştiyê ya Cîhanê li pêşiya Izbanê daxuyaniya çapemeniyê da. Di daxuyaniyê de pankarta “Ger çiya, mirov û heta mirin jî westayî be, niha helbesta herî xweş aştî ye” hate vekirin û dowîzên ‘Aştiyê’ yên bi gelek zimanan hate hilgirtin.
Li ser navê Platfromê Zelîha Danyelî daxuyanî da. Danyelî diyar kir ku berjewendiyên dewletên emperyalîst şeran kûr dike û bal kişand ser bandorên hilweşîner ên şer li ser jin, zarok û xwezayê. Danyelî îşaret bi sûcên şer ên ji Xezeyê heta Sûriyeyê kir û anî ser ziman ku bêdengiya navneteweyî komkujiyan dike ji rêzê.
Girseyê piştî daxuyaniyê, bi berzkirina dirûşmeyan ber bi têketina sûka Karşiyakayê meşiyan û zincîra aştiyê çêkirin.
