Li bajarê Freiburg im Breisgau yê Elmanyayê, pêşangeha bi sernavê “Jin, Jiyan, Azadî – Li Bakur û Rojhilatê Sûriyeyê Şoreşa Jinê” vebû. Di çalakiya ku beşdariyeke zêde hebû de, têkoşîna azadiya jinê, şoreşa jinê ya li Rojava û girîngiya piştevaniya navneteweyî derketin pêş.
EV ŞOREŞ VÎNA HEVPAR A JINAN E
Axaftina vekirinê li ser navê Austellunggruppe Jin Jiyan Azadî, ji aliyê Newroz Sonmezer ve hat kirin. Newroz Sonmezer diyar kir ku pêşangeh bi armanca xuyakirina destkeftiyên dîrokî û siyasî yên şoreşa jinê hatiye amadekirin.
Sonmezer got, “Jin, Jiyan, Azadî cewherê şoreşa jinê ye” û destnîşan kir ku têkoşîna azadiya jinê ya li Rojava ne tenê ezmûneke herêmî ye, lê modeleke gerdûnî ya veguhastina civakî ye. Newroz Sonmezer anî ziman ku ev şoreşa di pêşengiya jinên Kurd de pêş ketiye, bi tevlîbûna jinên Ereb û jinên enternasyonalist re veguheriye îradeyeke hevpar a jinan.
Sonmezer diyar kir ku têkoşîna rêxistinkirî ya jinan hêza bingehîn a guhertina civakî ye û got: “Ev destkeftî bi hêsanî bi dest neketin. Bi berxwedana jinan a ku bi salan belav bûye derketin holê. Ji ber vê yekê divê em bi hêztir xwedî lê derkevin.”
TUNDÎ PIRSGIRÊKEKE AVANİYÊ YE
Piştre Berpirsyara Jinan a Şaredariya Freiburgê (Frauenbeauftragte der Stadt Freiburg) Simone Thomas axivî û bal kişand ser wê yekê ku tundiya li ser jinan ne pirsgirêkeke takekesî ye, lê pirsgirêkeke avaniyê ye.
Simone Thomas diyar kir ku li Elmanyayê ji her sê jinan yek di jiyana xwe de herî kêm carekê rastî tundiya fîzîkî an jî zayendî tê û her çar deqeyan carekê jinek dibe qurbana tundiya nav malê; wê destnîşan kir ku qirkirina jinan encama herî giran a neheviya sîstematîk e.
Simone Thomas anî ziman ku divê Peymana Stenbolê bi awayekî çalak were sepandin û got ku stargehên jinan tije ne û navendên şêwirê di tengasiya darayî de ne. Simone Thomas bi bîr xist ku jin di siyasetê de bi têra xwe nayên temsîlkirin û got ku wekhevî mercê bingehîn ê civakeke adiltir û ewletir e.
DAIŞ Û ÇETEYÊN WEKE WÊ JI ŞOREŞA JINÊ DITIRSIN
Nûnera Die Linke Ani ya ku di çalakiyê de axivî, diyar kir ku wan ji jinên Rojava gelek tişt hîn bûne. Nûnerê anî ziman ku geşedanên dawî yên li Rojava bi eşkereyî nîşan didin ku DAIŞ û çeteyên mîna wê ji şoreşa jinê ditirsin.
Ani got, “Lê divê bizanibin ku ew ê encamê negirin” û destnîşan kir ku destkeftiyên jinan bi têkoşîneke mezin pêk hatine û parastina van destkeftiyan ji bo hemû jinan girîngiyeke jiyanî ye. Ani got, “Ev destkeftî ji bo me jinan pir girîng in. Divê em bi hêztir xwedî lê derkevin.”
TÊKOŞÎNA 12 SALAN BI TÊRA XWE NAYÊ NASÎN
Di dawiyê de li ser navê Komîteya Ewropayê ya WJAS’ê Anett Bende axivî û got ku gelên Ewropayê têkoşîna jinê ya 12 salan a li Rojava bi têra xwe nas nakin. Anett Bende got, “Ev yek pir xemgîn e” û diyar kir ku divê ev têkoşîn ji raya giştî ya cîhanê re bi hêztir were vegotin.
Anett Bende da xuyakirin ku li Rojava jinên Kurd û Ereb komîteyên hevpar ava kirine û bi hev re têkoşînê dimeşînin; wê anî ziman ku şoreşa jinê ne tenê berhema jinên Kurd e, lê berhema hevpar a jinên Ereb û enternasyonalist e jî.
Anett Bende got, “Veqetîn û revîna wan ji jinan nîşanî me dide ku ev şoreş wan ditirsîne” û soz da ku ew ê xwedî li şoreşa jinê derkevin û vê yekê li seranserê cîhanê bidin bihîstin; “Em ê bi rojên Jin Jiyan Azadî vê dengî mezin bikin.”
ÇALAKÎ DÊ DU HEFTEYAN BIDOME
Piştî axaftinan beşdaran bi hev re xwarin xwarin, serdana standên agahdariyê kirin û li ser têkoşîna azadiya jinê sohbet kirin. Materyalên ku pêvajoya dîrokî ya şoreşa jinê vedibêjin li qada pêşangehê rastî eleqeyeke mezin hatin.
Hate diyarkirin ku çalakiyên ku di 24’ê Sibatê de dest pê kirine dê du hefteyan berdewam bikin û bi panel, atolye, nîşandana fîlman û civînên piştevaniyê re dê dengê têkoşîna azadiya jinê li Freiburgê bilind bibe.
