Li gorî daneyên fermî yên ji aliyê Konseya Hilbijartinê ya Neteweyî ve hate eşkerekirin, Partiya Sosyalîst a Yekbûyî ya Venezuelayê (PSUV) a bi serokatiya Maduro ji 24 eyaletan li 23 eyaletan walîtî qezenç kir.
Tenê eyaleta Cojedesê di destê muxalefetê de ma. Di hilbijartinên qanûndanînê de jî lîsteyên neteweyî yên tifaqa Maduro ji sedî 82.68 ê dengan bi dest xist. Jimartina dengan dewam dike.
JI SEDÎ 42 Ê HILBIJÊRAN TEVLÎ HILBIJARTINÊ BÛN
Ji sedî 42 ê hilbijêran tevlî hilbijartinê bûn. Lê belê muxalefet îdîa dike ku tevlîbûna li hilbijartinê gelekî kêm e.
Hate îdîakirin ku gelek navendên dengdanê yên li paytext Caracasê vala bûn.
Li gorî anketa Delphos a beriya hilbijartinê, tevlîbûna li hilbijartinê wê ji sedî 16 bûya.
Siyasetmedarê muxalîf ê nêzî Maria Corina Machado, Juan Pablo Guanipa jî di nav de 70 kes beriya hilbijartinê hatin binçavkirin. Guanipa bi îdîaya endametiya li ‘tora terorê’ û hewldana sabotekirina hilbijartinê hate sûcdarkirin.
Li tevahiya welêt zêdeyî 400 hezar wezîfedarên ewlekariyê di hilbijartinê de wezîfe kirin.
