Newroz wê îsal bi dirûşma “Newroza Azadî û Demokrasiyê” li gelek bajaran bi rengekî girseyî bê pîrozkirin. Rakirina tecrîda li ser Rêber Apo û daxwazên li ser çareseriya aştiyane û demokratîk wê di pîrozbahiyan de derkevin pêş. Amadekariyên ji bo pîrozbahiyên Newrozê dewam dikin û tê payin ku bi tevlîbûneke xurt Newroz bê pîrozkirin.
Hevberdevkê Înîsiyatîfa Yekîtiya Demokratîk Mehmet Kamaç bi bîr xist ku Newroza 2026’an di bin siya bûyerên li Rojhilata Navîn de tê pêşwazîkirin û anî ziman ku Kurdistan navenda şerê herêmî ye. Kamaç ragihand ku Newroz ji ber vê sedemê ji bo Kurdan divê bibe “Newroza azadî, demokrasî û yekîtiya neteweyî.”
‘BERXWEDANA LI ROJAVA RUHÊ YEKÎTIYA NETEWEYÎ NÎŞAN DA’
Kamaç diyar kir ku êrişên li ser Rojava hesta yekîtiyê û piştevaniyê ya xurt a navbera gelê Kurd afirand û Kurdên li çar parçeyên Kurdistanê û li dîasporayê di vê pêvajoyê de helwesteke hevpar nîşan dan. Kamaç destnîşan kir ku di pûçkirina hin planên navneteweyî de vî ruhê yekîtiyê roleke bi bandor lîst.
Kamaç got, “Eger gelê Kurd bi ruhê yekîtiyê tevnegeriya bûya, dibe ku planên li ser tinekirina Kurdan, li ser bêîradekirin û înkarkirina Kurdan bi ser ketibûya. Lê belê Kurdan bi ruhê yekîtiyê li ber xwe dan û ev plan pûç kirin. Ji ber vê yekê jî Newroza 2026’an ji bo Kurdan wê bibe Newroza azadî û yekîtiya neteweyî.”
Kamaç anî ziman ku gelê Kurd wê qadên Newrozê bi xurtî dagire û Newroza 2026’an wê ji aliyê aştî û azadiyê ve bibe demeke girîng.
Hevberdevkê Înîsiyatîfa Yekîtiya Neteweyî diyar kir ku Newroz ji bo gelê Kurd ne tenê cejnek e, di ehman demê de sembola têkoşîna azadî û berxwedana li dijî zilmê ye û destnîşan kir ku yekîtiya neteweyî ji bo Kurdan mecbûriyeteke dîrokî ye.
‘NEWROZ ZEMÎNA HERÎ XURT A YEKÎTIYA NETEWEYÎ YE’
Mehmet Kamaç destnîşan kir ku ji bo xurtkirina yekîtiya neteweyî ya Kurdan Newroz zemîneke girîng e û got, têkoşîna azadiyê ya Kurdan, lêgerîna yekîtiya neteweyî û daxwaza statuyê ketine nava hev, lewma gelekî girîng e ku Newroz bi ruhê yekîtiya neteweyî bê pîrozkirin.
