Hevserokê Bajarê Wanê yê DBP’ê û hiqûqnas Cemal Demîr qonaxa duyemîn a pêvajoya “Aştî û Civaka Demokratîk” nirxand û anî ziman ku ji bo pêvajo bi rengekî erênî bi rê ve biçe divê statû azadiya Rêber Apo misoger bibe.
Demîr rapora ku di 18’ê Sibatê de ji aliyê Meclîsê ve hate eşkerekirin nirxand û diyar kir ku rapor meseleya Kurd bi giranî bi perspektîfa ewlekariyê dinirxîne. Demîr got, “Ji roja ku vê pêvajoyê destpê kir û pê ve dihate dîtin ku dewlet meseleya Kurd di çarçoveya teror û ewlekariyê de dinirxîne. Em dibînin heman nêzîkatiyê bandor li rapora komîsyona Meclîsê jî kiriye. Di raporê de mesele bi giranî di çarçoveyeke ewlekariyê de hatiye nirxandin û di vê der barê de hin pêşniyarên çareseriyê hatine kirin.”
Bi dewamî Demîr got, “Bêyî ku navê meseleyê lê bike, aliyên wê yên siyasî û dîrokî bêne destnîşankirin, nêzîkatiyeke çareseriyê ya li ser perspektîfa ewlekarî û ceza hatiye nîşandan. Jê heye ku bi hin guhertinên li Qanûna Mûhakemeya Ceza û Qanûna Ceza ya Tirk wê pirsgirêk çareser bibe. Di rpaorê de bi taybetî di xalên 6. û 7. de sererastkirinên bi vî rengî hene.”
Demîr işaret bi nîqaşên li nava raya giştî yên li ser raporê kir û bi bîr xist ku gelek derdoran rexne kirin ku rapor nikare ji banga 27’ê Sibatê re bibe bersiv, lê li gel vê yekê jî rapor bi temamî bêker nîne, ji hin aliyan ve dikare ji bo pêvajoya derbasbûnê bibe çarçoveyek.
‘PÊVAJO BI SÊ QONAXAN DIKARE BÊ MEŞANDIN’
Demîr diyar kir ku çareseriya meseleya Kurd bi pêvajoyeke ji sê qonaxan dikare bê nirxandin û destnîşan kir ku girîng e di qonaxa destpêkê de sererastkirinên qanûnî yên li ser pêvajoya derbasbûnê bêne kirin. Demîr ragihand ku di qonaxa duyemîn de qanûnên entegrasyon û ahengiyê dikarin bikevin rojevê û di qonaxa dawî de jî divê guhertinên destûra bingehînî bêne nîqaşkirin. Demîr got, di vê çarçoveyê de mijarên weke perwerdeya bi zimanê dayikê, pênaseya welatîbûnê û erkên rêveberiyên xwecihî li ser bingeha destûra bingehîn dikarin bêne nirxandin.
‘STATU Û AZADIYA OCALAN GIRÎNG E’
Demîr bi dewamî anî ziman ku ji bo rêveçûna pêvajoyê pêwîstî bi mercên wekhev ên muzakereyê heye û got, “Eger weke muzakerevanê sereke wê Birêz Abdullah Ocalan di nava vê pêvajoyê de be, divê astengiyên fîzîkî, hiqûqî û siyasî yên li pêşiya vê yekê bêne rakirin. Ji bo nêzîkatiyeke rast a li vê pêvajoyê û pêşvebirina pêvajoyê divê mercên hevdîtinê û ragihandinê bêne hêsankirin.”
Demîr destnîşan kir ku divê mercên girtîgehê yên Rêber Apo bêne başkirin, derfetên hevdîtinê werin berfirehkirin û anî ziman ku bersiva hiqûqî ya vê yekê jî ‘mafê hêviyê’ ye.
Her wiha weke yek ji gavên cihê baweriyê jî Cemal Demîr anî ziman ku divê dawî li pêkanîna qeyûman bê anîn.
