Siyasetmedarê Kurd Lezgîn Botan ji ANF’ê re nirxandin kir û anî ziman ku biryara PKK’ê ya bi dawîkirina têkoşîna çekdarî û xwe fesixkirinê, destpêka demeke dîrokî ye ku wê li Rojhilata Navîn û Tirkiyeyê pêşî li aştiyê veke.
Botan diyar kir ku ev geşedan bi banga Rêber Apo pêk hat û destnîşan kir ku divê pêvajo weke derfeteke dîrokî were nirxandin.
Botan got, “PKK’ê pêvajoya têkoşîna çekdarî ya 47 salan bi dawî kir. Ev gav, hewldaneke aştiyê ya mezin e ku bi pêşengiya Birêz Ocalan hatiye avêtin. Di qada navneteweyî de jî bandoreke cidî ava kir. Li Tirkiyeyê derfeteke ku deriyê veguhertina demokratîk veke, ava bûye.”
Botan diyar kir ku gelê Kurd bi hemû saziyên xwe û siyaseta xwe erênî nêzî vê biryarê bûye û çavê wan êdî li gavên dewleta Tirk e û ev tişt got:
“Aliyê Kurd fedakarî kir. Êdî bendewariya ji dewletê mezin e. Eger ev pêvajo dîsa ji demê re bê hiştin û mîna berê veguhere taktîkên mijûlkirin û tasfiyeye, gel êdî bawerî bi vê yekê nayîne. Ji ber ku gelê Kurd di vê mijarê de xwedî tecrubeyên dîrokî ye û êdî van deman bi van tecrubeyan re dinirxîne.
‘BÊBAWERIYA GEL NE VALE YE’
Dewleta Tirk gelek caran wisa xuya kir ku bi navê aştiyê pêvajo dane destpêkirin. Di tevahiya dîrokê de di dawiya pêvajoyên bi vî rengî de komkujî qewimîn. Lewma divê gavên ku dewlet bavêje, bawerî bide. Bêbaweriya gel ne vale ye. Gelê Kurd êdî naxwaze were xapandin. Gelê Kurd gotina xwe got û gav avêt. Niha dora dewletê ye. Em aştiyeke mayînde û bi rûmet bi hev re dikarin ava bikin.”
‘ZIMANÊ MEDYAYÊ BI JEHR E, ZIMANÊ DEWLETÊ JÎ GEFXWAR E’
Botan destnîşan kir ku aliyê Kurd ji bo çareseriyeke aştiyane îrade nîşan da, ev yek girîng e û diyar kir ku li hemberî vê yekê ziman û nêzîkatiya dewletê hîna gefxwar e.
Botan ev tişt bilêv kir: “Zimanê medyayê bi jehr e, zimanê dewletê bi gefan tejî ye. Operasyonên leşkerî hîna didomin. Generalên Tirk hîna zimanê gefê bi kar tînin. Ev nêzîkatî nayê qebûlkirin.
PKK’ê têkoşîna çekdarî bi dawî kir. Ji vir û şûnde di operasyonên tên kirin de eger yek gerîla zirarek biçûk jî bibîne, ne dîrok ne mirovahî ne jî gelê Kurd vê yekê qebûl nake.”
Botan anî ziman ku heya gavên şênber neyên avêtin, ev pêvajo nameşe û got, “Êdî divê daxuyaniyên sembolîk bên derbaskirin. Helbet meclîs divê pêvajoyê bigire ser xwe, lê belê ya herî girîng gavên pratîk e. Bêyî ewlehiya hiqûqî û zagonî, aştiya mayînde ne pêkan e. Gelê Kurd îro ji her demê xurttir e, hîn bi rêxistinkirî û di zemînê navneteweyî de hîn diyarker e. Dem dema vê yekê ye ku em vê yekîtiyê veguherînin serketina dîplomatîk û statuya siyasî. Li her çar parçeyan divê pêvajoya avakirina statuya xwe û xurtkirina deskeftiyên heyî destpê bike. Em xwedî derfetek dîrokî ne.”
