Yekitîya Niştimaniya Kurdistanê (YNK) duh êvarê fermana girtinê ji bo Serokê Eniya Gel (Berey Gel) Lahûr Şêx Cengî derxist. Îşev di navbera hêzên YNK’ê yên ku hewl didan bikevin Otêla Lalezarê ku Lahûr Şêx Cengî lê ye û hêzên girêdayî Lahûr Şêx Cengî de pevçûn derket.
Hate ragihandin ku Lahûr Şêx Cengî li Otêla Lalezarê ya li Semta Serçinarê ya Silêmaniyê ye ku niha pevçûn lê dijwar bûne û hate diyarkirin ku birîndar hene.
Bi destpêkirina pevçûnan re, li du xaniyên li Lalezarê şewat derket û asîmanê bajar ji ber şewatê bi dûkêla reş hatiye girtin.
Berdevkê Dadgeha Silêmaniyê Dadwer Selah Hesen, bi tometa “ewlehî xistina xeteriyê” li gorî madeya 56’an a destûra bingehîn, fermana girtinê ji bo Serokê Eniya Gel Lahûr Şêx Cengî derxist.
Dadwer Selah Hesen di daxuyaniyê de ev tişt gotibû; “Fermana girtinê ji bo Lahûr Şêx Cengî û çend kesên dine. Ger sûcdarî werin îspatkirin, dibe ku Cengî herî kêm heft sal cezayê girtîgehê lê were birîn.”
Her wiha Selah Hesen tekez kir ku ev biryar bi tu partî yan jî berjewendiyên siyasî ve girêdayî nîne. Lê belê, dezgehên medyayê yên girêdayî Lahûr Şêx Cengî diyar kirin ku tu fermanek wisa ji wî re nehatiye ragihandin.
Li gor agahiyên dawiyê (05:20) yên ji devera pevçûnê hatin ragihandin, di encama pevçûnan de kuştî û birîndar hene, lê bi awayek zelal hêjmara kuştî û birîndaran nayê zanîn.
Waliyê Silêmaniyê Heval Ebubekir jî daxuyanî da û diyar kir ku divê dawî li şer were.
