Platforma Saziyên Demokratîk di 11’emîn salvegera komkujiya 5’ê Hezîranê ya li dijî mitînga hilbijartinê ya HDP’ê ya Qada Stastyonê ya Amedê de, li Qada Stasyonê çalakiya bîranînê li dar xist.
Malbatên kesên ku di êrîşê de jiyana xwe ji dest dane, parlamenterên Partiya Wekhevî û Demokrasiyê ya Gelan (DEM Partî), rêxistinên civaka sivîl û nûnerên partiyên siyasî û gelek kes tevlî daxuyaniyê bûn.
Bîranîn bi deqîqeyekî rêzgirtinê destpê kir. Piştre Bavê Civan Aslan ê ku di êrîşê de hate qetilkirin, Bahattîn Aslan axivî. Aslan xwest ku berpirsên komkujiyê eşkere bibin û wiha got, “Bi navê Îslamê bêyî ku bibêjin zarok û extiyar qetil kirin. Kî vê kir, çawa kir, kî li gel wan in? Ev pirs hîna li benda bersivê ne. Em edaletê dixwazin. Em ji bo aştiyeke bi rûmet li vir in. Em tevî her tiştî jî dibêjin aştî.”
Hevseroka Komaleya Aştiyê ya 10’ê Cotmehê Hatîce Çelîk kesên ku di komkujiyên Amed, Pirsûs û Enqere Gar de jiyana xwe ji dest dan, bi bîr anî û got ku di pêşîlêgirtina komkujiyê de piştguhkirinên cidî hene. Çelîk diyar kir ku ger Komkuiya Amedê were ronîkirin, wê komkujiyên piştre werin pêşîlêgirtin.
Hevseroka Rêxistina DEM Partî ya Amedê Gulşen Ozer diyar kir ku ew ê 5’ê Hezîranê neyê ji bîr kirin û wiha got, “Bombe ji bo aştiyê hatin avêtin. 5 hevalên me jiyana xwe ji dest dan, zêdeyî 400 kes birîndar bûn. Bi vê êrîşê re xwestin têkoşîna Kurdan bi dawî bikin, lê bi ser neketin. Malbat îro li vê derê hesabê pirs dikin. Rêya wan rêya me ye. Em ê aştiyeke bi rûmet ava bikin û diyarî wan bikin.”
Hevberdevkê Însîyatîfa Yekîtiya Demokratîk Mehmet Kamaç jî îşaret bi eşkerekirina hêzên li pişt komkujiyan kir.
Piştî axaftinan bi dirûşmeyên “Şehîd namirin” kulîlk li cihê ku teqînê lê hat kirin, hate berdan û çalakî bi dawî bû.
