Dîlên azadiyê Baz Efrîn, Mustefa Efrîn û Mustefa Reşîd Efrîn piştî zêdetirî 30 salan ku di zindanên dewleta Tirk de man serbet hatin berdan. Dîlên azadiyê yên ketin nava gelê xwe yê Rojavayê Kurdistanê serdana gaziyan kirin.
Dîlên azadiyê yên ji aliyê gaziyan ve bi coş hatin pêşwazîkirin, têkildarî jiyana xwe, rewşa siyasî û hatina cem hevrêyên xwe yên gazî nêrînên xwe anîn ziman.
Yek ji dîlê azadiyê Baz Efrîn di axaftina xwe de got, “Ez 30 salî weke di nava dojeheke sincirî de raza me hesab dikim. Niha jî dema di nava heval, dost û xelkên xwe de hênaseyeke azad dikişînim ji bo min gelekî watedar e. Lê divê were zanîn ku bêyî azadiya fizîkî ya Rêber Apo ti wateya azadiya min jî tineye. Ez pir kêfxweşim ku di hizûra hevalên gazî de dikarim çend hestên xwe bînim ziman.”
Baz Efrîn bal kişand ser pêvajoya aştî û civaka Demokratîk a Rêber Apo daye destpêkirin û wiha domand, “Rêber Apo zêdetirî 52 salan e ji bo çareseriyeke aştiyane têkoşîn dike. Ji ber dewleta Tirk derfeta têkoşîna siyaseta demokratîk nedida, têkoşîna çekdarî hatibû destpêkirin. Em jî weke dîlên azadiyê niha xwedî derfetin. Em ji her kar û xebatên aştiyê bi hêz bike re amade ne. Ez bi xwe ji pêvajoyê re amade me. Ez gelekî kêfxweşim ku di nava hevalên gazî de me. Rêber Apo gotiye,
‘Gazî şehîdên me yên zindî ne.’ Ez jî sozdariya xwe, ji wan re didim diyarkirin.”
Dîlê azadiyê Mistefa Efrîn jî 30 salên xwe di girtîgehên dewleta Tirk de bihurandiye û niha jî bi kelecan û coşeke mezin di nava me de ye. Hevrê Mistefa yê piştî hevalê xwe Baz Efrîn mafê axaftinê wergirt got, “Ez jî tevlî nêrînên hevalê Baz dibim. Ez gelekî bi kelecan im ku niha di nav we şehîdên zindî de diaxivim. Hûn ji bo me hemûyan jî manewiyat û bawerî ne. Ez bi hêvî me wê rojekê Rêber Apo jî wiha di nav me de be. Ez jî dibêjim ji bo pêvajoyê amade me. Jixwe peyama Rêber Apo ji bo me dîlên azadiyê hebû. Em jî dixwazin jêre bibin bersiv û erkên xwe pêk bînin.”
Mistefa Reşîd Efrîn piştî her du hevrêyên xwe ev nirxandin kir, “Ez bi xwe pir bi kelecan im ku niha di nav we hevalên, bi qîmet û hêja de me. Her kêliyek jiyana mirovan a li derve hêja ye mirov bi wate û azadî bike. 30 salan di nav girtîgehên dewleta Tirk de em rastî gelek zehmetiyan hatin. Lê her tim Rêber Apo, şehîd, gel û hûn hevalên gazî ji bo me bûn sebir û manewiyat. Di roja me de pir derfet hene em têkoşîna xwe xurt bikin. Em ê ji Rêber Apo û pêvajoya dest pê kiriye re bibin bersiv û xwedî li têkoşîna xwe derkevin. Gazî ji bo me pir bi qîmet, watedar û manewiyat in.”
Piştî axaftinên her sê hevrêyên dîlên azadiyê gaziyên şer kêfxweşiya xwe ya têkildarî serdanê anîn ziman û gotin, “Em ê jî têkoşîneke layiqî Rêbertî û şehîdan bimeşînin. Hedef û armancên hevrêyên xwe em ê bi serkeftinê tacîdar bikin.”
Herî dawî jî gaziyên şer û dîlên azadiyê bi komî wêne kişandin.
