Komîteya Pêşîgirtina li Îşkence û Muameleya Xerab a Ewropayê (CPT) di navbera 7-11’ê Nîsanê de serdana hin girtîgehên Tirkiyeyê kir. Lê belê CPT neçû Girtîgeha Girtî ya Ewlekariya Bilind a Tîpa F a Îmraliyê ku Rêber Apo lê tê girtin. CPT, herî dawî di sala 2022’yan de çûbû serdana Girtîgeha Îmraliyê lê rapora xwe bi raya giştî re parve nekiribû.
Endamê Însiyatîfa Azadiya Rêber Abdullah Ocalan a Sûriyeyê Silêman Îsa Ehmet têkildarî neçûna CPT’yê ya li Girtîgeha Îmraliyê û tecrîdê bi bîr xist ku bi salan e bi hincetên cuda hevdîtina parêzer û malbatê ya bi Rêber Apo re tê astengkirin.
Silêman Îsa Ehmet anî ziman ku li Girava Îmraliyê maf û azadiyên bingehîn tên binpêkirin û got: “Hemû zagonên nafneteweyî têne binpêkirin. Ti mînakên Girtîgeha Îmraliyê tineye. Gelek saziyên navneteweyî sardana Îmraliyê kirin û ev serdan kirin rapor û tewsiye kirin. Li mixabin heta niha dewleta Tirk a dagirker ev tewsiye pêk neanîne. Her wiha di demên borî de çendin caran CPT’yê sardana Îmraliyê kir. Çûyîna CPT’yê ji bo Îmraliyê êdî ji wateya xwe derketiye. Ji ber ku heta niha ti raporên xwe bi raya giştî re parve nekirine. Herî dawî berî du salan serdan hatibû kirin. Di salên berê de jî gava diçûn piştî çend salan û vir de rapor eşkere dikirin. Lê mixabin di raporên wan de jî tenê serdan hatiye kirin dihat gotin û agahiyên berfireh cih nedigirtin. Ev raporên dihatin weşandin jî ne hiqûqî bûn û bêhtir siyasî bûn. CPT ne li gorî hiqûqê û mafên mirovan tevdigeriya, li gorî hesasiyeta dewleta Tirk tevdigeriya. Ji bo vê yekê çûyîna CPT’yê ji bo Îmraliyê êdî ji wateya xwe derketiye.”
Silêman Îsa Ehmet got ku eger CPT encamên serdanên xwe yên li girtîgehan neke rapor û bi raya giştî re parve nek ti wateya serdanên wan nîn e û ev tişt got: “Li girtîgehên Tirkiyeyê bi hezaran girtiyên siyasî hene. Heta niha CPT’yê ti tişt derbarê wan de dernexistiye holê. Heta bi niha ti rapor û daxuyanî nehatine dayîn. Ji ber vê yekê em helwesta CPT’yê û neçûyîna wan a ji bo Îmraliyê şermezar dikin. Her wiha bêdengiya wan a li dijî binpêkirinên mafên mirova ên li girtîgehê Tirkiyeyê jî cihê şermezar kirinê ye. Bi vê boneyê em bang li CPT’yê û hemû saziyên mafên mirovan ên nafneteweyî dikin ku bi rola xwe rabin.”
