Di vê dema ku Sûriye rû bi rûyê kêşeyên mezin dibe, Yekîneya Jinan li Bakur û Rojhilatê Sûriyê rolek girîng dilîze. Jinan li vê herêmê prensîbên dadperwerî û wekheviyê nîşan dan û ji bo çareserkirina pirsgirêkên jinên Sûriyê di bin desthilata nû ya demkî de gelek forum bi rê ve birin. Desthilata nû rola jinan di beşdarbûna nivîsandina destûra nû de paşguh dike. Di Foruma Diyalogê ya ku ji aliyê Platforma Çalakiyên Hevbeş a Tevger û Rêxistinên Jinan ve hat organîzekirin de, rola sereke ya jinên Bakur û Rojhilatê Sûriyeyê di bilindkirin û nîqaşkirina pirsgirêkên xwe de bû.
Di forumê de hate xwestin ku komkujiyên li dijî jinan ên li peravên Sûriyeyê bên ronîkirin. Li hêleke din, di forumê de pirsa “destûr” hat nîqaşkirin.
Di vê çarçoveyê de endama Navenda Lêkolînên Jineolojiyê Eliya Osman ji ajansa me re axivî. Eliya di destpêka gotinên xwe de behsa kuştin, talankirin û destavêtinê kir û ev yek weke tawanên li dijî mirovatiyê bi nav kir.
Eliya anî ziman ku binpêkirinên ku li Sûriyê diqewimin û tawanên ku li dijî sivîlan tên kirin, encama zihniyeteke tundrew û tund e. Eliya ragihand ku eger ev îdeolojî û zîhniyeta tundrew neyê têkbirin, rastiya Sûriyê dê wan ber bi wêranî û şerê navxweyî ve bibe.
Eliya tekez kir ku divê jinên Sûriyê li dijî van rêxistinên terorîst dengê xwe bilind bikin û got, “Li Bakur û Rojhilatê Sûriyeyê jinan têkoşîn û berxwedana xwe berdewam kirin. Divê hemû jinên Sûriyê dengê xwe bilind bikin da ku nûnertiya civakê bikin û ji bo bidestxistina edalet û wekheviyê di destûra nû ya Sûriyê de bibin xwedî biryar.”
Hevserokê Desteya Rêveber a Şaredariyan a Bakur û Rojhilatê Sûriyê Stêr Murad jî ji ajansa me re wiha got: “Em ji bo piştgiriya jinên ku li beravên Sûriyê rastî komkujiyan tên, li vir in. Weke jinên Kurd, Ereb û Suryan em li Bakur û Rojhilatê Sûriyeyê xwedî yek armanc in, ew jî avakirina Sûriyeyeke nû ye ku hemû pêkhateyên Sûriyeyê tê de cih bigirin û jinên Sûriyeyê bi rêxistinbûyîn û bi bandor li Bakur û Rojhilatê Sûriyeyê bên rêxistinkirin.”
Stêr Murad destûra nû şermezar kir û ev tişt bilêv kir: “Divê Neteweyên Yekbûyî ji bo rawestandina şerê navxweyî di navbera pêkhateyên gelê Sûriyê de destwerdanê bike. Me komkujiyên ku li peravên Sûriyeyê li dijî Elewiyan pêk hatine, dîtin û em ji bo piştgiriya jin û malbatên Sûriyeyê li vir in. Em weke jinên Bakur û Rojhilatê Sûriyeyê li vir in û daxwazên me hene. Ev ne tenê daxwazek e, daxwaza Sûriyeyeke demokratîk e, Sûriyeke ku mafên hemû pêkhateyan garantî bike.”
