“Banga Aştî û Civaka Demokratîk” ya ku Rêber Apo di 27’ê Sibatê de bi raya giştî ya cîhanê re parve kir, di gelek derdoran de deng veda. Lê ji aliyê dewletê ve gavên li gorî vê bangê nehatine avêtin.
Tevî ku çend roj bi ser derbas bûne tu gav nehatine avêtin jî, li gel ragihandina agirbestê ya PKK’ê jî êrîşên li ser Rojavayê Kurdistanê û Başûrê Kurdistanê dewam dikin.
Rojnamevan Dogan Ozguden têkildarî banga Rêber Apo û bûyerên piştî wê pirsên ANF’ê bersivand.
Dogan Ozguden agirbesta ku Rêberê Gelê Kurd Abdullah Ocalan cara ewil di 1993’an de ragihandibû bi bîr xist û anî ziman ku di wan rojan de li studyoyên Med TV zindî vê biryara agirbestê guhdarî kiriye û got, “Vê banga aştiyê wê rojê jî kiribû.”
Ozguden bir bîr xist ku tevî hemû hewldanan jî dewletê bersiv nedaye vê bangê. Ozguden anî ziman ku Rêber Apo di girtîgehê de jî hewldanên aştiyê dike û ev hewldan ji ber dewleta Tirk bêencam man.
‘OCALAN DI HÊZÊN PÊŞVERÛ DE HÊVIYÊ ÇÊKIR’
Ozguden bal kişand ser banga Devlet Bahçelî û fikarên xwe anî ser ziman. Ozguden diyar kir ku tevî her tîştê jî banga Rêberê Gelê Kurd Abdullah Ocalan di hêzên şoreşgerî yên pêşverû de hêviyê çêkir. Ozguden îşaret bi gavên şênber neavêtina ji aliyê desthilatdariyê ve kir û destnîşankirina zemîna hiqûqî û siyasî ya Rêber Apo bi bîr xist. Ozguden bi gotina “Ji bo pêşveçûna vê divê teqez zindanên li Tirkiyeyê bên valakirin û ev pêkanînên qeyûmê werin rawestandin” gavên ku divê bên avêtin rêz kir.
Ozguden got ku mijar ne tenê çek berdan e û anî ziman ku divê li dijî êrîşên li ser Bakur û Rojhilatê Sûriyeyê jî tedbîr bêne girtin.
‘DAXWAZÊN DEMOKRATÎK DIVÊ BI DENGEKÎ BILINDTIR BÊN KIRIN’
Ozguden mitînga ku KCDK-E û TJK-E’ê li Brukselê ji bo diyarkirina helwesta ji bo banga Rêber Apo, li pêşiya Parlamentoya Ewropayê lidarxistin, bi bîr anî. Ozguden diyar kir ku Serokê Giştî yê CHP’ê Ozgur Ozel jî li Parlamentoya Ewropayê biaxive û got ku di vê mijarê de tenê helwesta erênî têrê nake û divê daxwazên demokratîk zêdetir werin gotin.
‘DIVÊ EWROPA Û DYE ROLA XWE BILÎZE’
Ozguden destnîşan kir ku êrîşên li ser Bakur û Rojhilatê Sûriyeyê dewam dikin û diyar kir ku girîng e ku rêveberiya Bakurê Sûriye wekî muxatab were girtin û şer were rawestandin. Ozguden bilêv kir ku di lêgerîna aştî û demokrasiyê de divê dewletên Ewropayê û DYE jî rol bilîze û banga piştevaniya ji bo berxwedana ku li Rojav dewam dike kir.
‘BIFIKAR IM, LÊ BI HÊVÎ JÎ ME’
Ozguden diyar kir ku ew rêzê dide gelê Kurd ku tevî berdêlên giran jî dane nêzîkatiyekî çêker pêşkêş dikin. Ozguden anî ziman ku tevî ku aliyê Kurd gavê avêtiye jî, di aliyê desthilatdariyê de nediyarî dewam dike û got ku li gel ku ji vê yekê bifikar e, hêviyê wî jî heye. Ozguden ragihand ku derbarê pêvajoya aştiyê de pêwîstî bi seferberiyê heye û bi bîr xist ku di vê wateyê de erkên girîng dikeve ser hêzên Kurd, çep, sosyalîst, pêşverû, şoreşger û bi taybetî CHP’ê û muxalefetê.
Ozguden wiha dawî li axaftina xwe anî: “Ez nîqaş nakim ku navê wê bibe Tirkiye yan tîştek din, an ala wê çi be. Lê ev erdnîgariya herî xweşik a cîhanê ye, bila bibe welatê ku xwediyê demokrasiya herî xweşik e. Yekane daxwaza min ev e.”
