Operasyona leşkerî ya bi navê ‘’Balîkatan’’ a salane ya bi pêşengtiya Filîpînan û DYE’yê tê lidarxistin, dest pê kir. Îsa cara ewil hejmareke zêde leşkerên Japonyayê jî tevlî operasyonê bûn û bi tevahî zêdetirî 17 hezar leşkerên piyade, hewayî û behrî li qadê ne.
Her wiha Fransa, Avûstralya, Zelandaya Nû û Kanada jî piştgiriyê didin operasyonê. Operasyon li bakurê Filîpînan, herêmên li Taywanê dinêrin û Behra Çîna Başûr tên meşandin.
Rayedaran dan zanîn ku di çarçoveya bernameyê de wê cebilxaneyên rastîn werin bikaranîn. Tê plankirin ku yekîneyên Japonyayê wê bi sîmulasyona moşeka digere keştiyekê hedef bigire. Berdevkê Filîpînan Dennis Hernandez jî diyar kir ku senaryoyên bi vî rengî bi armanca xurtkirina koordînasyona leşkerî tên lidarxistin.
Rayedarê leşkerî yê DYE’yî Robert Bunn jî anî ziman ku operasyon armanca ’tifaqa saxlem’’ û hedefa ‘’Pasîfîka Hîndê ya azad û vekirî’’ ya di navbera her du welatan de nîşan dide. Tê îfadekirin ku bicihkirina Washîngtonê ya berbehs a herî mezin van salên dawiyê ye.
Operesyon di dema ku Çînê li ser Taywanê zexta xwe leşkrî zêde kiriye de pêk tê. Serokkomarê Filîpînan Ferdinand Marcos Jr. beriya niha anîbû ziman ku divê welatê wî li hemberî krîzeke Taywanê ya muhtemel amade be.
Her wiha rêveberiya Pekînê li hemberî vê pêngava leşkerî ya li herêmê nerazîbûnên xwe nîşan da û Manilayî bi ‘’xirabkirina aramiya herêmî’’ sûcdar dike. Operasyon nîşan didin ku li Asya-Pasîfîkê hevsengiyên hêzê her ku diçe hesastir dibin.
