Têkildarî hevdîtina 15’e Nîsanê ya li Şamê ku di navbera Fermandarê Giştî yê QSD’ê Mazlûm Ebdî, Hevseroka Daîreya Têkiliyên Derve ya Rêveberiya Xweser Îlham Ehmed û Serokê Hikumeta Demkî ya Sûriyeyê Ahmed El Şara de pêk hat; asta karên entegrasyonê, astengî û zehmetiyên heyî, Îlham Ehmed ji ANHA’yê re axivî.
Îlham Ehmed destnîşan kir ku di civîna li Şamê de li ser astengiyên di pêkanîna pêvajoya entegrasyonê de rawestîne. Ji bo rakirina astengiyan herdu alî (Rêveberiya Xweser û Şam) di nava hewldanan de ne.
Li gorî vê yekê, yek ji xalên esasî yên civînê sîstema perwerdeyê ye ku dîplomayên xwendekaran hîn nehatine erêkirin û got, “Di ser peymana 29’ê Çileyê de wextek zêde derbas bû, lê hîn jî ev mijar nehatiye çareserkirin. Me li hev kir ku wezîrê perwerdeyê û wezîrê hîndekariya bilind ji bo avakirina mekanîzmayekê serdana Walîtiya Hesekê bikin û vê mijarê bi encam bikin. Her wiha li ser sîstema perwedeyê û ziman wê di dema pêş de hevdîtin bêne kirni û biryar bêne dayin.”
Îlham Ehmed anî ziman ku heta niha di sîstema îdarî de tenê li qadên tenduristî û perwerdeyê midûriyet hatine tayînkirin û got, midûriyetên nehatine tayînkirin wê bi lez bêne tayînkirin. Îlham Ehmed ragihand ku ji bo temamkirina wezîrfdarkirinên li saziyan wê mekanîzmayeke nû bê avakirin.
RÊVEÇÛNA ENTEGRASYONÊ
Îlham Ehmed ragihand ku di mijara entegrasyonê de hin gav hatin avêtin lê belê pêvajo gelekî giran bi rê ve diçe. Îlham Ehmed got, di mijar wezîfedarkirin û temsîliyat li herêman de gavên erênî hatine avêtin, lê belê di asta midûriyet û wezaretan de hîn gav hene ku divê werin avêtin.
DERIYÊN SÎNOR
Yek ji mijarên esasî yên entegasyonê jî rêvebirina li deriyên sînor e. Îlham Ehmed diyar kir ku ji bo rêvebirina Sêmalka û deriyên din ên sînor mekanîzma hatiye avakirin, personelên Rêveberiya Xweser li gorî esasê entegrasyonê wezîfeya xwe dewam dikin.
TEMSÎLIYETA JINÊ Û ASTENGÎ
Îlham Ehmed destnîşan kir ku di mijara îrade û temsîliyeta jinê de hîn jî pirsgirêk heye û got, “Li nava Rêveberiya Xweser gelek jinan wezîfe dikirin. Ji aliyê avanî ve saziyên Rêveberiya Xweser û saziyên hikumetê weke hev nîne, bişibin hev jî di asta rêveberiya midûriyetan de cudahî heey. Ji bo wezîfedarkirinên di çarçoveya entegrasyonoê de navên hem jin hem jî bê têne diyarkirin. Heta niha ji bo midûriyetên perwerde û tenduristiyê tayînkirin çêbûn, lê belê herdu jî mêr in. Ji ber vê jî tevlîbûna jinan divê weke rewşeke taybet bê nirxandin û rolên girîng ji wan re bê dayin. Di vê mijarê de zehmetî û astengiyên cidî hene.”
‘YPJ DI ROJEVÊ DE YE’
Îlham Ehmed destnîşan kir ku yek ji astengiyên li pêşiya wan, mijara YPJ’ê ye û got, “Di nîqaşan de ji bo YPJ’ê hîn encameke nû bi dest neketiye, lê belê ev mijar hîn jî di rojevê de ye. Nîqaşên li ser fermîkirina YPJ’ê di rojeva hikumeta demkî de ye. Ev rewş heta ku lihevkirin bibe wê dewam bike.”
Yek ji mijareke entergasyonê jî bajarên Hesekê û Kobanê nûnerên parlamentê (Meclîsa Gel a Sûriyeyê) hilbijêrin. Îlham Ehmed diya rkir ku amadekariyên di vê mijarê de bi rêya komîteyeke navendî û komîteya amadekar a Walîtiya Hesekê tê kirin û komîteya amadekar xwedî înîsiyatîfê ye.
ŞAREDARÎ WÊ JI NÛ VE BÊ BIRÊXISTINKIRIN
Îlham Ehmed bal kişand ser sîstema Şaredariyên Gel ên li Rojava û anî ziman ku demokrasî li ser xizmet û temsîliyetê bi pêş dikeve, lewma divê ji bo pêvajoya nû amade be.
KARÊN DESTÛRA BINGEHÎN
Îlham Ehmed qala mijara amadekirina destûra bingehîn a Sûriyeyê ya nû kir û destnîşan kir ku piştî nûnerên Rojava yên ji bo parlamentê hatin diyarkirin wê meseleya destûra bingehîn bi rengekî cidî bikeve rojevê. Îlham Ehmed got, “Kurd wê di nava komîteya nivîsandina destûra bingehîn a Sûriyeyê ya nû de hebin. Pêwîstiya Sûriyeyê bi destûra bingehîn a nû heye û ji bo vê jî komîteyek ji temsîliyeta hemû gelan divê. Kurd hevparên bingehîn ên avakirina vî welatî ne, lewma divê rola wan bingehîn be. Ev yek wê di rojên pêş de pêk were.”
Hevseroka Daîreya Têkiliyên Derve ya Rêveberiya Xweser Îlham Ehmed ragihand ku mijara girtiyan hîn jî di rojevê de ye û got, di hevdîtinê de hate destnîşankirin ku girtî hemû divê di dema herî kurt de bêne berdan.
