Fermandare Giştî yê Hêzên Sûriyeya Demokratîk (QSD) Mazlûm Ebdî li Forûma Aştî û Ewlekariyê ya Rojhilata Navîn a 6’emîn axivî ku li Dihokê tê lidarxistin. Mazlûm Ebdî anî ziman ku di nîqaşên li ser paşeroja Sûriyeyê de divê firsenda wekhev ji Rojava re bê naskirin û got, “Pêvajoya aştiyê ya ku Rêber Apo da destpêkirin ne tenê ji bo Tirkiyeyê, di heman demê de ji bo tevahiya Rojhilata Navîn şensek e.” Ebdî diyar kir ku hevdîtinên li Dewletên Yekbûyî yên Emerîkayê (DYE) divê hîn bi lez bêne kirin û got, “Em neçar in ku pêvajoya diyalogê heta dawiya salê bi ser bixînin.”
Li bajarê Dihokê yê Herêma Kurdistanê ya Federe, bi pêşengiya Zanîngeha Kurdistan Amerîkan forûm tê lidarxistin. Nêçirvan Barzanî, Mesrûr Barzanî, Serokwezîrê Iraqê Mûhammed Şiya es-Sûdanî, bi sedan lîderên ji gelek welatan û herêmê, nûnerên partiyên siysaî, dîplomat û akademîsyen beşdar bûn.
Mazlûm Ebdî bal kişand ser pêşketinên li Bakur û Rojhilatê Sûriyeyê û diyar kir ku civaka navneteweyî ji bo jinûve avakirina Sûriyeyê şensek daye Şamê. Mazlûm Ebdî got, “Em dixwazin heman firsend ji bo Rojava jî derbasdar be. Me êriş nebir ser kesî, me gef li kesî nexwar. Hebûna me ya li nava hêzên ewlekariyê yên Sûriyeyê divê weke gefekê neyê dîtin; berevajî vê yekê ji bo ewlekarî û aramiya herêmî hêmaneke girîng e.”
Ebdî destnîşan kir ku ji bo bicihanîna Peymana 10’ê Adarê divê tifaq bê xurtkirin û destnîşan kir ku li ser bingeha hevdîtinên li DYE’yê têne meşandin, ji bo avakirina “sîstemeke nû” divê hewldan bêne zêdekirin.
Fermandarê Giştî yê QSD’ê Ebdî Pêvajoya Aştî û Civaka Demokratîk jî nirxand ku bi pêşengiya Rêber Apo tê meşandin û got, “Pêvajoya aştiyê ya ku Rêber Apo li Îmraliyê da destpêkirin ne tenê ji bo Tirkiyeyê, her wiha ji bo tevahiya Rojhilata Navîn şensek e. Em piştgiriyê didin vê pêvajoyê. Herêma Kurdistanê her tim li gel me sekinî. Em tevkariya Serok Mesûd Barzanî ya li diyaloga Kurd a li Rojava û pêvajoya aştiyê ya li Tirkiyeyê silav dikin. Em li bendê ne kue v piştgirî dewam bike.”
Ebdî li ser sîstema nû ya li Sûriyeyê ava bibe got, “Em ê nehêlin ku li sîstema navendî ya dema Esad vegere. Piştî şerê 15 salan divê sîstemeke nenavendî bê avakirin û pêkhate karibin xwe bi rê ve bibin.”
Forûm bi axaftina beşdaran dewam dike.
