Komeleya Çandê ya Pîr Sûltan Abdal (PSAKD) piştî ku kujerên Komkujiya Madimakê hatin berdan 33 rojan dest bi nobetê kirin. PSAKD’ê di roja dawî ya nobeda xwe de xwestin heta ber Wezareta Edaletê bimeşin, lê girse ji hêla polîsan ve hat astengkirin.
Girseyê pankarta ku wêneyê 33 kesên li Sêwasê hatin şewitandin vekir, ji Kolana Ziya Gokalp ber bi wezaretê ve dest bi meşê kir. Girseyê bê navber dirûşmên “Dewleta qatil wê hesab bide”, “Sêwasê ji bîr neke û nehêle were jibîrkirin”, “Li dijî faşîzmê mil bi mil” berz kirin.
Piştî êrîşa polîsên Tirk çalakiya rûniştinê destpê kir. Piştre jî navên 33 kesên ku li Madimakê hatin qetilkirin hatin gotin.
Piştî ku destûra meşê nehat dayîn, Serokê PSAKD’ê Cuma Erçe ragihand ku îro roja dawî ya nobetê ye, lê ji ber destwerdanê ew ê nobeda xwe bidomînin.
Girseya ku meşa wan hat astengkirin li Kolana Ziya Gokalp daxuyaniya çapemeniyê da. Serokê Giştî yê PSAKD’ê Cuma Erçe daxuyanî xwend. Erçe diyar kir ku di ser komkujiyê re 32 sal derbas bûn û ew li edaletê digerin û wiha got: “Mixabin, em di nav demek tarî de derbas dibin. Zîhniyeta ku ji bo desthilatdariya xwe bidomîne her cure pêkanînên dijdemokratîk girtin, binçavkirin dimeşîne û heman zîhniyetê qatilên Madimak beraat kir. Zîhniyeta cîhadî ku duh li Sêwas, Mereş, Çorûm, Gazî, Gezî, Ûmraniye, Pirsûs, Qada Îstasyona Trenê ya Enqereyê, Roboskî, Dêrsim, Koçgirî, Reyhanli û gelek deverên din komkujîiyên hovane pêk anî, îro jî hewl dide welatê me desteser bike.”
Hat ragihandin ku heta ber bi Wezareta Edaletê ve bimeşin wê nobeda xwe bidomînin. Daxuyanî bi berzkirina dirûşmeyan bi dawî bû.
