Ji beşdarên Konferansa Aştî û Civaka Demokratîk a Navneteweyî Hevberdevkê Dibistana Partiyê ya DEM Partiyê Dogan Erbaş anî ziman ku têkoşîna aştiyê girîng û demdirêj e.
‘CIVÎNEKE GIRÎNG BÛ KU AŞTÎ LÊ HATE NÎQAŞKIRIN’
Dogan Erbaş ragihand ku konferans gaveke girîng bû û got, “Di pêvajoyê de ku bi Banga Aştî û Civaka Demokratîk a 27’ê ibatê re destpê kir, em îro malovaniyê ji çalakiyeke girîng re dikin. Gelek aliyên wê hene. Yek jê; hînbûna tecrûbeyên aştiyê yên li cografyayên cuda girîng e, yek jî di çalakiya me de yekemcar ji YNK û PDK’ê peyam hatin. Di demekê de ku nîqaş li ser yekîtiya neteweyî ya Kurd tê kirin, ev girîng bû. Aliyekî sêyemîn jî ew e ku ne tenê tecrûbe hatin vegotin. Her wiha hate destnîşankirin ku aştî çiqasî nirxekî civakî ye, têkoşîna ji bo aştiyê çiqasî girîng e. Jinek ku ji Ûkraynayê tevlî bû, qala cih û girîngiya jinan a di nava têkoşîna aştiyê de kir. Lewma di dmeekê de ku aştî tê axaftin ev civîna girîng hate lidarxistin. Em ê bandora wê ji niha û pê ve bibînin.”
‘NÎŞAN DA KU ABDULLAH OCALAN AKTOREKÎ POLÎTÎK Ê GIRÎNG E’
Erbaş destnîşan kir ku bi daxuyaniyan hate nîşandan ku Rêber Apo çawa aktorekî polîtîk ê bi bandor e û axaftina xwe bi vî rengî dewam kir, “Her wiha li aliyê dewlet û hikumetê jî tê dîtin bê di nava belaweliyeke çawa ya siyasî de ye, xwedî hewldaneke samîmî nîne. Di dema pêş de jî dibe ku pêvajoyên bi vî rengî yên zehmet hebin. Li gorî min, ev yek nîşaneyeke çanda siyasî ya li Tirkiyeyê ye. Me di mînaka CHP’ê de dît. Xwe nedan ber çûyîna giravê. Pirsgirêkeke ewqasî girîng û dîrokî ye, ku ji destpêka vî welatî û vir ve heye, lê belê hem desthilatdarî hem jî muxalefet di nava helwesteke ne cidî de ne. Samîmî nînin, cidî nînin. Lê belê em dest jê bernedin. Em ê bang li tevahiya raya giştî bikin ku li hemberî van nêzîkatiyên ne cidî têkoşînê bimeşîne. Aştî tenê bi têkoşînê dikare bê bidestxistin. Em nikarin helwesta xwe li gorî ya dewletê diyar bikin. Bi têkoşîna hemû aliyên civakî yên alîgirên aştiyê re desthilatdarî, muxalefet nikarin vê helwesta xwe bi demdirêjî dewam bikin.”
‘TIRKIYE WÊ NEÇAR BIMÎNE KU BIGUHERE’
Erbaş diyar kir ku aştî têkoşîneke demdirêj e û got, “Salek li pey ma. Birêz Ocalan digot qonaxa destpêkê. Em niha derbasî qonaxa duyemîn bûn. Derbasî dema amadekirina qanûnên azadiyê bûn. Ji hin aliyan, hinek derdorên li nava me jî di nav de rexneyan dikin û dibêjin, salek derbas bû, PKK’ê, aliyê Kurd ewqasî gav avêt lê belê li aliyê din gavek nehate avêtin. Rexne dibe ku hebe, em ji rexneyan hêzê werdigirin. Lê belê rast nîne ku mirov li bendê bimîne ku pirsgirêka Kurd ku xwedî giraniyeke dîrokî, cidî û aliyên rojane ye, bi carekê ve bê çareserkirin. Hin nêzîkatiyên ku bi lez dike û zêde bi fikar in, rast nîne. Bûyeran, zexta raya giştî, konjonktura navneteweyî çareseriya pirsgirêka Kurd xist rojeva Tirkiyeyê. Heta ku pirsgirêka Kurd neyê çareserkirin gav ber bi paşeroja Tirkiyeyê ve nikare bê avêtin. Sedsala duyemîn bi vî rengî nabe. Pirsgirêkên gelekî giran ên aborî, siyasî û civakî wê dewam bike. Lewma niha bi şênberî gavên hatibin avêtin nebe jî divê hêviya me ti carî neşikîne, divê me nexe nava bêhêvîbûnê. Ev yek ji ber rêbaza jiberkirî û klasîk a siyasetê ye ku çareseriya pirsgirêkan timî taloq dike. Li hundir nebûna şer bi xwe jî destketiyeke. Tayînnekirina qeyûman li ser şaredariyên me jî destketiyeke. Hevdîtinên li Rojava bi tena serê xwe destketiyeke. Cih ji bêhêvîbûnê re nîne, bêguman em ne xeyalperest in; têkoşîna aştiyê hate dayin, wê bê dayin, Tirkiye wê neçar bimîne ku biguhere.”
