Parlementerê DEM Partiyê yê Amedê Serhat Eren, destnîşan kir ku azadiya fîzîkî ya Rêber Apo, wê ji bo çareseriya pirsgirêka Kurd û aştiya civakî bibe pêngavek diyarker.
Parlamenterê DEM Partiyê Serhat Eren ji ANF’ê re axivî û destnîşan kir ku divê standartên hiqûqê yên navneteweyî ji bo azadiya fîzîkî ya Rêber Apo bê bi cih anîn. Eren, diyar kir ku misogerkirina azadiya Rêber Apo ji bo pirsgirêka Kurd û aramiya herêmê wê bibe gaveke girîng.
Eren, diyar kir ku Rêber Apo ji aliyê dîrokî û siyasî ve di çareseriya pirsgirêka Kurd de xwedî roleke sereke ye û destnîşan kir ku ew di heman demê de ji bo demokratîkbûyîna Tirkiyeyê û aramiya herêmê aktorekî stratejîk e.
Serhat Eren, bibîr xist ku Rêber Apo ji aliyê tevahiya Kurdên li her çar aliyê cîhanê ve weke îrade tê qebûlkirin û wiha got, “Azadiya fîzîkî ya Birêz Ocalan, ji bo pêvajo bi lez, bi bandor û saxlem bi rêve biçe û li beşên mezin ên civakê bawerî û hêvî were avakirin, di asteke krîtîk e de ye. Ji ezmûnên berê jî diyar dibe di nava şert û mercên tecrîdê ku mafên herî bingehîn ên hiqûqî û însanî û ‘mafê hêviyê’ binpê dike, pêvajoyeke saxlem nayê rêvebirin. Ji nîqaşên mîna çareserî, pêvajo ango tiştek din wêdetir divê azadiya fîzîkî ya Birêz Ocalan bê misogerkirin.”
Eren, anî ziman ku di vê çarçoveyê de gava awil a ku divê were avêtin ew e ku hiqûq li gorî pîvanên navneteweyî pêkanîne û wiha domand, “Divê tecrîda li Îmraliyê were rakirin û hevdîtinên malbat û parêzeran bi temamî bêyî astengî, bên pêkanîn. Ya duyemîn jî, di çarçoveya ‘mafê hêviyê’ de, li ber ronahiya biryarên DMME û Komîteya Wezîran a Konseya Ewropayê, azadiya fîzîkî ku mafekî hiqûqî û însanî ye û dema wê hatiye, divê bê misogerkirin.”
Eren, diyar kir ku Rêber Apo bi awayekî zelal gotiye ‘Ez xwedî wê hêza teorîk û pratîkî me ku dikarim vê pêvajoyê şer û pevçûnê veguherînim zemînek siyasî û hiqûqî.’ Eren, anî ziman ku di salên 2013-2015’an de wan samîmiyet, biryardarî û bandora Rêber Apo ya li ser vê mijarê bi awayekî herî zelal di nava civakê de dîtine û şahidi jê re kirine.
Eren, bilêv kir ku divê hemû girtiyên siyasî bên berdan û got, “Ger çareseriyek rast were pêş, ger pirsgirêka Kurd bi hemû sedemên xwe ve were çareser kirin, divê azadiya hemû girtiyên siyasî pêk were. Îro bi hezaran kes ji ber ku di çarçoveya îdeolojiya Tevgera Azadiya Kurd de têkoşîna siyasî dimeşînin tên darizandin û di girtîgehan de tên girtin. Mînaka vê ya herî baş jî Doza Kobanê ye.”
Serhat Eren, destnîşan kir ku meseleya Kurd ne pirsgirêka ewlehiyê ye û wiha axivî, “Ji bo ev pêvajo bi ser bikeve, divê beriya her tiştî di civakê de çanda diyalog û mutabaqatê bê pêşxistin. Girîng e ku derdorên cuda yên siyasî, hêzên demokratîk û civaka sivîl di vê mijarê de cih bigirin. Divê saziyên siyasî yên li Tirkiyeyê pirsgirêka Kurd ne weke pirsgirêka ewlehiyê, weke pirsgirêka demokratîkbûyîn û mafên mirovan binirxînin. Azadiya birêz Ocalan ne daxwaza kesekî tenê ye, lêgerîna tevahiya Tirkiyeyê ya ji bo aştî û demokrasiyê ye.”
Eren, da zanîn ku Rêber Apo ji bo çareseriyê aktorê herî sereke ye û wiha domand, “Tesbîtên Birêz Ocalan ji bo aştiya herêmê girîng in. Pêwîstiya me hemûyan bi vê yekê heye. Birêz Ocalan bi tevahî ji pêvajoyê re amade ye, lê dewlet û siyaset çiqasî ji vê pêvajoyê re amade ye wê di pratîkê de derkeve holê.”
Eren, da xuyakirin ku êrîşên çeteyên girêdayî Tirkiyeyê yên li dijî Rojava siberoja tevahiya gelên li wir dixe xeteriyê û got, “Bê gûman her bûyereke ku di vê demê de pêk tê, têkiliyeke wê ya dîrokî heye. Pêşketinên heyî çareseriya vê pêvajoyê ferz dike. Êrîşên li hemberî Rojava û komkujiyên li hemberî sivîlan, tabloyeke ku ne tenê gelê Kurd di heman demê de siberoja hemû gelên li herêmê tehdît dike, diafirîne. Pêkanîna pêşniyarên Birêz Ocalan ên ji bo diyalog û çareseriyê, dibe ku firsendekê bi xwe re bîne ku dawî li polîtîkayên bi vî rengî yên êrîşkar bîne.”
