Serokê Meclîsê Nûman Kûrtûlmûş roja Înê li gel serokwekîllên partiyên siyasî yên li Meclîsê koma wan heyî têkildarî komîsyona pêvajoya aşitiyê civînek li dar xist. Serokwekîlê Koma AKP’ê Abdulhamît Gul, Serokwekîlê Koma CHP’ê Mûrat Emîr, Serokwekîla Koma DEM Partiyê Gulîstan Kiliç Koçyîgît, Serokwekîlê Koma MHP’ê Erkan Akçay, Serokwekîlê Koma İYÎ Partiyê Bûgra Kavûncû û Serokwekîlê Koma Partiya Yenî Yol Bulent Kaya beşdarî civînê bûn.
Parlamenterê Amedê yê DEM Partiyê Serhat Erentêkildarî civîna berbehs ji ANF’ê re axivî.
DIVÊ PÊNASEYA ERKAN WERE KIRIN
Parlamenterê Amedê yê DEM Partiyê Serhat Eren di destpêka axaftina xwe de diyar kir ku divê Komîsyon pêşiyê pênaseya erkan bike û anî ziman ku divê di vê çarçoveyê de komîsyon berfireh û beşdar be û got: ‘’Divê pêşiyê qadên erkan ên komîsyona ku wê were avakirin, were diyarkirin. Piştre divê guncavî vê yekê hejmara kesan were diyarkirin. Em tim dibêjin ku divê komîsyon beşdar û berfireh be. Divê nûnertiya Tirkiyeyê bike. Divê hemû partiyên siyasî tevlî bibin. Her wiha parlamenterên serbixwe jî hene ku divê ew jî beşdar bin. Helbet a niha komîsyon ji partiyên siyasî ên li Meclîsê pêk tê û bi înîsiyatîfa Serokê Meclîsê tê avakirin. Lê belê di demên pêş de divê ev komîsyon veguhere komîsyoneke ku bikare xwe berfireh bike. Divê xwedî raye be ku jêrkomîsyonan jî ava bike. Bi vî rengî divê rêxistinên civakî, rêxistinên hiqûqî, partiyên siyasî ên ne li Meclîsê jî daxilî komîsyonê bibin.’’
DIVÊ JI BO HEMÛ AKTORAN PARÊZBENDIYA YASAYÎ HEBE
Serhat Eren di dewama axaftina xwe de bal kişand ser tecrûbeyên berê û got ku divê ji bo hemû aktoran parêzbendiya yasayî were amadekirin û got: ‘’Ev yek ji bo beşdarbûnê gelekî girîng e. Tê îfadekirin ku piştgiriya ji bo vê pêvajoyê ji sedî 70 ye. Ev rêjeyeke baş e. Divê ev rêje were parastin. Ji bo parastinê jî hewceyî bi baweriyê heye. Ji bo vê yekê jî zemîna hiqûqî hewce ye. Me di salên 2013-2015’an de gelek tişt tecrûbe kirin. Di vê pêvajoyê de beşeke mezin ji aktorên tevlî pêvajoya çareseriyê bûn bi temamî ji temînata yasayî bêpar hatin hiştin. Pêvajo têk çû û bi talûkeyeke bi vî rengî re rû bi rû man. Bes aliyê dewletê, atorên di nava dewletê de ji wê yasayê sûd wergirtin. Ji bo vê yekê divê aktorên ku di vê komîsyonê de cih bigirin, xwe ewle hîs bikin. Girêdayî vê yekê hewceyî bi parêzbendiyeke yasayî heye. Bo nimûne gelek kes ji ber hin fikaran tevlî merasîma li Silêmaniyê nebûn. Ji ber wê yekê divê komîsyon sererastkirineke yasayî bike.’’
DIVÊ RÎSK JI HOLÊ WERIN RAKIRIN
Eren diyar kir ku divê heyeteke serbixwe jî çavdêriya pêvajoyê bike û got: ‘’Divê mekanîzmayeke çavdêriyê ya serbixwe jî hebe. Wê ev yek pêvajoyê hêsantir bike. Ji bo jiholêrakirina talûkeya têkçûna pêvajoyê jî ev yek hewce ye. Her wiha divê li Tirkiyeyê derfetên beşdarbûna siyaseta demokratîk, jiyana demokratîk û jiyana siyasî jî werin avakirin ku PKK’ê ev yek di merasîma 11’ê Tîrmehê de anî ziman. Her wiha ji bo serkeftina vê pêvajoyê divê şert û mercên Birêz Ocalan jî werin axaftin û nîqaşkirin. Ji bo vê yekê jî divê xebatek were meşandin. Divê entegrasyon gelekî jî di wateyeke neyînî de neyê bikaranîn. Divê komîsyon vê yekê jî bi baldarîbigire dest.’’
