Di daxuyaniya Navenda Ragihandinê ya QSD’ê de ahte destnîşankirin ku li Tişrîn û Qereqozaxê 4 droneyên bêmirov ên dewleta Tirk a dagirker hatin xistin.
Daxuyanî bi vî rengî ye:
“Êrişên dagirkeriya Tirk û çeteyên wê yên li ser herêmên Bakur û Rojhilatê Sûriyeyê di meha sêyem de berdewam dikin ku hemû cureyên çekan tevî balafirên şer, balafirên bêmirov û çekên giran, bi kar tînin.
Li eniya bendava Tişrînê duh (Sêşem) artêşa Tirk a dagirker û çeteyên wê bi çekên giran gundên derdora bendavê topbaran kirin, di heman demê de balafirên şer jî gundê Xirbet El Zemala yê li bakurê bendavê bombebaran kir û di encamê de ziyanên madî çêbûn.
Çeteyên dagirker hewl da bi balafirên bêmirov li dijî çeperên hêzên me êrişê bikin, hêzên me 4 ji wan xistin xwarê.
Li eniya Qereqozaxê; balafirên şer ên dagirkeriyê li derdora Pira Qereqozaxê gundê Xeseqê bombebaran kir, di encamê de ziyanên madî çêbûn. Her wiha artêşa Tirk a dagirker û çeteyên wê gundên El Tîna, Cada, Bîr Heso, Xeseq, Dîkan, Melha û Senee û girên Sêvê û Qereqozaqê bi zêdetirî 80 topên hawanê topbaran kirin û ziyanên madî li mal û milkên şêniyan bûn.
Li hember êriş û bombebarana dewleta Tirk a dagirker û çeteyên wê, şervanên me çalakiyek li dijî baregehên artêşa Tirk a dagirker ên li derdora pira Qereqozaxê li dar xist, wesayiteke zirxî û wesayiteke leşkerî ya ji bo veguhastina leşkeran dihat bikaranîn, rûxandin. Her wiha çalakiyeke din jî li dijî baregeheke din a dagirkeriya Tirk a li aliyê rojavayê pirê pêk anîn. Di çalakiyê de 4 leşkerên dagirker birîndar bûn û 2 sîstemên radarê hatin rûxandin.
Li eniya Dêrhafirê, balafirên bêmirov ên artêşa dagirker duh tevahiya rojê li asîmanê herêmê firiyan.”
