Faîk Çîrîk ê ku di sala 1995’an de cezayê muebetê lê hat birîn, piştî 30 salan beriya du rojan ji Girtîgeha Girtî ya Hejmar 1’an a Tîpa T ya Bandirmayê hate berdan. Çîrîk ku piştî berdana xwe hat navçeya Akdenîz a Mêrsînê, îro bi pêşengiya TUAY-DER’ê bi serdanekî di mala xwe de hat pêşwazîkirin.
MEBYA-DER, Meclîsa Dayikên Aştiyê, TJA, rêxistiên DEM Partî ya bajêr û navçeyan, Komaleya Piştevanî û Alîkariyê ya Êlihê û gelek kes tevlî serdanê bûn. Girseyê ji pêşiya avahiya DEM Partî ya navçeya Akdenîzê heta mala malbatê ya li Taxa Guneşê, bi dirûşmeyên “Bijî berxwedana zindanan” û “Girtiyên siyasî rûmeta me ne” meşiyan.
Çîrîk diyar kir ku bi hezaran hevalên wan hîna di girtîgehê de ye û wiha got, “Min silavên girtiyan anîn. Moralê wan di cih de ye. Lê heta ku Rêbertiya me li Îmraliyê be, em ne azad in û ne jî bi moral. Ji ber vê yekê kêfxweşiya me nîvço ye. Kengê Rêbertiya me azad be, em ê hingî bi coş û azad bin.”
Dayika Aştiyê Emîne Eren ku di serdanê de axivî, diyar kir ku azadiya Çîrîk wan kêfxweş kiriye, lê ji ber girtiyên di girtîgehê de mane, kêfxweşiyeke nîvço dijîn. Dayika Aştiyê wiha got, “Em di wê baweriyê de ne ku pêvajoya çareseriyê ya ku Rêbertiya me da destpêkirin, wê bigihe serkeftinê. Azadiya girtiyên me yên din jî nêz e. Em ê bi hev re wê kêfxweşiyê jiyan bikin.”
