Bi hezaran gelê bajarên kantona Cizîrê ya Herêma Bakur û Rojhilatê Sûriyeyê bi armanca şermezarkirina êrişên komên çete yên dewleta Tirk ên di nava hêzên hikumeta demkî de li dijî taxên Şêxmeqsûd, Eşrefiyê û Benî Zêd ên bajarê Helebê de xwepêşandan li dar xistin û piştgiriya xwe bi gelê van taxan re nîşan da.
ÇILAXA
Li bajarê Çilaxa, bi sedan şênî li Çerxerêya Jinan a bajêr kom bûn û pankartên “Bijî berxwedana Eşrefiyê û Şêxmeqsûdê” û “Bi rihê berxwedana Şêxmeqsûd û Eşrefiyê em ê destkeftiyên şoreşa xwe biparêzin”, her wiha wêneyên qurbaniyên êrişan bilind kirin.
Meşa girseyî ber bi navenda bajêr ve bi dirûşmên şermezarkirina êrişan û silavkirina berxwedana gel bi rê ket, dema ku gihaşt Qada Şehîd Mesûm veguherî mîtîngê.
Di mîtîngê de, endama Meclisa Perwerdeyê ya bajêr Nezha Sêfedîn li ser êrişên berdewam ên çeteyên hikumeta demkî axivî. Nezhayê diyar kir ku ev êriş dê biryardarî û îradeya gelê rêxistinkirî û berxwedêr kêm nekin û şêniyên Çilaxayê amade ne tev li berxwedana Şêxmeqsûd û Eşrefiyê bibin.
Endamê Meclisa Rûspiyan a Bakur û Rojhilatê Sûriyeyê Hisên Sadiq jî êrişên li ser her du taxan şermezar kirin û got: “Bi navê şêniyên Çilaxayê, em li kêleka berxwedana şêniyên her du taxan li dijî planên dagirkirin, qirkirin û koçberkirina bi darê zorê radiwestin. Em bang li rêxistinên mirovî û mafên mirovan dikin ku tavilê tedbîran bigirin da ku van binpêkirinên li dijî sivîlan rawestînin.”
TIL KOÇER
Li bajarê Til Koçerê, meşê ji çerxerêya nêzîkî şaredariyê dest pê kir û ber bi Qada Şaredariya Gel ve çû.
Li ber avahiya şaredariyê, meş veguherî mîtingê ku bi deqeyeke rêzgirtinê dest pê kir.
Ji rêveberên Kongra Star a Til Koçer Delal El Şibî axivî û diyar kir ku êrişa li dijî taxên sivîlan binpêkirina qanûnên navneteweyî û peymanên mirovî ye. Delalê got ew piştgiriyê didin berxwedana rewa ya şêniyên taxên Şêxmeqsûd û Eşrefiyê.
Ji rêveberên meclisa bajarê Til Koçer Hisên El Eyo jî êrişên li ser taxên Şêxmeqsûd û Eşrefiyê şermezar kirin û wan wekî sûcê li dijî mirovahiyê bi nav kirin. El Eyo piştgiriya xelkê Til koçerê bo şêniyên Şêxmeqsûd û Eşrefiyê û Hêzên Ewlekariya Hundirîn anî ziman.
AMÛDÊ
Li Amûdê şênî bi berzkirina sloganên “Bijî berxwedana Şêxmeqsûdê” li Qada Jina Azad a Amûdê kom bûn. Piştî kombûyînê wêneyên birîndarên jin, zarok û mêr ên ku di encama êrişan de birîndar bûne, rakirin û dest bi meşê kir.
Di meşê de meşvanan pankartên “Bi can bi xwîn em te re ne Şêxmeqsûd”, “Şêxmeqsûd em bi te re heta mirinê”, “Em gelên cizîrê bi Şêxmqsûd re ne”, “Bendava berxwedanê”, “QSD hîmê artêşa neteweya gelê Sûriyeyê ye”, “Neteweya demokratîk rêça çareseriyê ye” rakiribûn.
Meşevan ji dema destpêkirina meşê ve heta gihaştina qada mîtîngê sloganên “Berxwedan jiyan e” û “Bijî berxwedanan Eşrefiyê û Şêxmeqsûd” berz kirin.
Meş li Qada Şehîd Cîhad veguherî mîtîngê, di mêtîngê de Endama Kongra Star Leyla Selman axivî bal kişand ser kiryarên dewleta Tirk a dagirker li hemberî pêşengên jin û da zanîn ku bila Erdogan bizane ew ê her li ser piyan bin, ji bo parastina û pêkanîna azadiya xwe dê her dem di nava têkoşînê de bin.
Leyla Selman diyar kir ku gelan li Bendava Tişrînê berxwedaneke dîrokî kirin. Berxwedan, têkoşîn û sozdayîna wan a bi şehîdên wan re wê bidome.
Hevserokê Partiya Yekîtiya Demokratîk li Amûdê (PYD) Tariq Deqorî da zanîn ku nakokiyên ku di nava planên li Rojhilata Navîn derdikevin, herî zêde bandorê li gelê Kurd dike. Divê Kurd li ber xwe bidin û têkoşîna xwe ya azadiyê bidomînin.
Tariq Deqorî destnîşan kir ku çêkirin û pêkanîna planên li dijî berjewendiyên gelan li Sûriye hîn bi dawî nebûye. Dixwazin hevpeymanên di navbera Rêveberiya Xweser û hikumeta demkî ya Sûriyeyê tune bikin, tê xuyakirin ku ev plan ji bo dewleta Tirk a dagirker tê sazkirin û got: “Têkoşîna me wê bidome, em tu carî nasekinin.”
Meş bi sloganên “Bijî berxwedana gelan” bi dawî bû.
QAMIŞLO
Li bajarê Qamişlo meş ji pêşiya Çerxerêya Sonî heta Stadyuma Şehîdên 12`ê Adarê dewam kir. Bi hezaran şêniyên ku herikîn qadan dirûşma “Bijî berxwedana Şêxmeqsûd û Eşrefiyê” berz kirin.
Li stadyûmê li ser navê Insiyatîfa Gel a Herêmê Welîd Denkilî axivî. Denkilî êrişên li ser Şêxmeqsûd û Eşrefiyê şermezar kir û got: “Hêza Ewlekariya Hundirîn, destaneke qehremaniyê dinivisîne. Rêveberiya demkî komkujiya li Şêx Meqsûd û Eşrefiyê pêk tîne. Li hember van êrişan gelê Şêxmeqsûd û Eşrefiyê dixwazin bi rûmet û aram jiyan bikin. Lê ev çeteyên girêdayî dewleta Tirk nahêlin ku bi aramî bijîn.”
Denkilî wiha dewam kir: “Bi van êrîşan wê nikaribin vîna gelê me bişkînin, Şêx meqsûd û Eşrefiyê wê bibin Kobaniya duyemîn. Çawa ku di Kobanê de şikestin wê di Şêxmeqsûd û Eşrefiyê de jî bişikin.”
Meş bi dirûşma “Bijî berxwedana Şêxmeqsûd û Eşrefiyê” bi dawî bû.
DÊRIK
Bi sedan xelkê Dêrikê bi armanca piştgiriya berxwedana Şêxmeqsûdê çalakiyek li dar xist. Di çalakiyê de wêneyên şehîdên taxên Şêxmeqsûd, Eşrefiyê û Benî Zêd hatin hildan û diruşmên “Bi can bi xwîn em bi te re Şêxmeqsûd û Eşrefiyê” hatin berzkirin.
Çalakî li pêş Navenda Şehîd Bawer a Tevgera Ciwanên Şoreşger a Sûriyeyê bi deqeyeke rêzgirtinê dest pê kir. Dûre endamê Meclisa Malbatên Şehîdan a Dêrikê Mihemed Şerîf Derwêş axivî. Derwêş êrişên li dijî taxên Helebê şermezar kirin û got ew planeke dewleta Tirk e.
Li aliyekî din jî endama Meclisa Bajarê Dêrikê Yasmîn Yehya êrişên li ser taxan şermezar kirin û anî ziman ku êrişên bi çekên giran li dijî welatiyan binpêkirina tevahî pîvanên mirovahiyê ne.
Koçberekî Efrînî jî êriş şermezar kirin û bang li tevahî Sûriyeyiyan kir ku bi hev re li hember êrişan bisekinin.
Çalakî bi diruşmên silavkiirna berxwedana Şêxmeqsûd û Eşrefiyê bi dawî bû.
GIRKÊ LEGÊ
Li bajarê Girkê Legê jî bi sedan şênî li Qada Şehîd Xebat kom bûn û li kolana sereke ya bajêr meşiyan.
Meş li navenda bajêr veguherî mîtingê. Piştî deqeyeke rêzgirtinê endama Meclisa Bajarê Girkê Legê Zekiya Berekat axivî û êrişên li ser taxên Şêxmeqsûd û Eşrefiyê şermezar kirin.
Zekiyayê diyar kir ku taxên Şêxmeqsûd û Eşrefiyê sembolên berxwedanê û keleheke li dijî êrişan bûn û got: “Berxwedana gel dê êrişên çeteyan têk bibe.”
Endamê Partiya Yekitiya Demokratîk (PYD) Ehmed El Hesen berxwedana şêniyên taxa Şêxmeqsûd a li dijî çeteyan silav kir û da zanîn kir ku berxwedana wan berxwedana gel e û hevgirtina gel dê dewam bike.
TIRBESPIYÊ
Bi sedan şêniyên bajarê Tirbespiyê, tev li meşa ji bo piştgiriya berxwedana taxên Şêxmeqsûd, Eşrefiye û Benî Zêd ên Helebê bûn.
Girseya gel li ber Navenda Perwerdeyê ya bajêr kom bûn û wêneyên kesên di bombebarana li taxan de şehîd bûne bilind kirin.
Meş li navenda bajêr veguherî mîtîngeke girseyî. Endama Meclisa Malbatên Şehîdan a kantona Cizîrê Selma Xelîl axivî û diyar kir ku polîtîkayên hikumeta demkî ji yên rejîma Baasê ne cuda ne. Selmayê piştgiriya xwe ji bo berxwedana qehremanî ya li taxên Şêxmeqsûd û Eşrefiyê anî ziman.
Endamê Însiyatîfa Gel Silêman Hisên jî axivî û êrişên li ser taxên Şêxmeqsûd û Eşrefiyê şermezar kirin. Hisên diyar kir ku ev êriş, êrişên DAIŞ`ê yên li ser Kobaniyê tînin bîra mirov.
