Pêngava “Niha dema jinê ye” ji aliyê Komalên Jinên Kurdistanê (KJK) ve di 2’ê Adarê de destpê kir. Yek ji sernavên ku di çarçoveya pêngavê de derdikeve pêş rêxistiniya komînê ye ku weke şêweyê rêxistiniya destpêkê ya civakê tê dîtin.
Gerîlayên tevgera azadiyê Goksû Gabar di çarçoveya pêngavê de girîngiya rêxistiniya komînê ji bo jinan ji ajansa me re nirxand.
Goksû Gabar 8’ê Adarê Roja Jinên Kedkar ên Cîhanê li jinan hemûyan pîroz kir û anî ziman ku 8’ê Adarê nîşaneya raperîna li dijî komkujiyê ye, biwatekirina 8’ê Adarê divê ne tenê qîrîna dirûşmên azadiyê be. Goksû Gabar işaret bi girîngiya têkoşîna hevpar a jiyana jinê kir.
Goksû Gabar qala “Banga Aştî û Civaka Demokratîk” a Rêber Apo jî kir û rol û mîsyona jinan a di vê pêvajoyê de bi bîr xist. Gabar destnîşan kir ku pêngava ji aliyê KJK’ê ve hatiye destpêkirin divê her roj hîn mezin bibe û ev yek jî tenê bi komînê dibe.
Gabar anî ziman ku divê ew bi feraseta “Komîn jiyanê diparêze” tevbigerin.
‘EM BI EXLAQÊ CIVAKÊ DIKARIN KOMÎNÊ AVA BIKIN’
Goksû Gabar got, berpirsyariyeke sereke ye ku dîroka jinê bi rengekî rast bê fêhmkirin û biwatekirin û têkildarî rêxistiniya komînê ev nirxandin kir: “Komîn ne bi qanûnan ne jî bi rêgeşan dikare bê avakirin. Komîn bi exlaqa civakê dikare were avakirin. Exlaqê civakê jî berhemeke jinan e.”
Goksû Gabar destnîşan kir ku xwedîderketina li vê berhema jinan armanca wan a bingehîn e û îdîaya gerîlayên jin a di vê mijarê de dubare kir.
