Civîna 12’emîn a Komîsyona Hevgirtina Neteweyî, Xwişk-Biratî û Demokrasiyê bi dawî bû. Civîna di du rûniştinan de pêk hat, navendên ramanê û rêxistinên lêkolînê nirxandinên xwe yên li ser pêvajoyê parve kirin. Di pêşkêşiyan de hate destnîşankirin ku piştgiriya raya giştî ji bo pêvajoyê zêde ye, lê gavên derengmayî pirsgirêkek baweriyê çêkirine.
‘SIYASETA NAVNETEWEYÎ DI NAVA GUHERÎNEKÊ DE YE’
Serokê Navenda Lêkolînên Rojhilata Navîn (ORSAM) Dr. Kadir Temîz diyar kir ku siyaseta navneteweyî di nav veguherînekê de ye Temîz anî ziman ku ji bo pêvajoy bidome divê nexşerêyek zelal bi raya giştî ya Tirkiye, Iraq û Sûriyeyê re were parvekirin.
‘PÊŞÎ PIRSGIRÊKÊN HIQÛQÎ’
Serokê Lêkolînên Genar Îhsan Aktaş diyar kir ku divê komîsyon mijarên hiqûqî bide pêşiya xwe û got, “Hin pirsgirêk mafên hiqûqî ne. Çareserkirina van pirsgirêkan wê bandorên pir erênî derxin holê. Destûra bingehîn a nû û vîzyonek xurt a demokratîkbûnê wê gelek pirsgirêkan ji xwe ber çareser bike.”
KURTULMUŞ: ZÊDEBÛNA RAZÎBÛNA CIVAKÎ GIRÎNG E
Serokê Meclisê Numan Kurtulmuş di axaftina xwe ya di dawiya civînê de diyar kir ku komîsyon pêşketinên erênî bi dest dixe û got, “Em di navbera destpêkê û qonaxa ku em gihîştine de cûdahiyên girîng dibînin. Em ê vê pêvajoyê di zûtirîn demê de biqedînin û raporeka xurt ku hêviyên me ji bo demokratîkbûn û serweriya hiqûqê destnîşan dike, pêşkêşî Meclisê bikin.”
Kurtulmuş destnîşan kir ku piştgiriya raya giştî ji bo pêvajoyê ji sedî 75 derbas bûye û wiha domand, “Bendewariya herî bingehîn a welatiyên me yên Kurd ew e ku dudiliyên wan ên derbarê nasnameyê de ji holê werin rakirin. Hestê wan ê aîdiyetê xurt e û ev misogeriya me ya herî mezin e.”
Kurtulmuş wiha got: “Ev pêvajoya ku bi danîna çekan a ji aliyê PKK’ê ve dest pê kir, divê em li ser avakirina paşerojek bihêz li hemû welatên herêmê û cîranên xwe, ji bo Tirk, Kurd, Ereb, Êzidî, Sunnî, Şîe û Elewiyan bisekinin. Ez dixwazim vê yekê jî tekez bikim: Em dikarin analîzên dîrokî bikin. Tiştek ku civakên me yên Rojhilatî jê hez dikin ev e ku pir li ser paşerojê biaxivin. Em dikarin li ser paîerojê biaxivin û pir baş analîz bikin. Lê ya girîng ew e ku em bi hev re îradeya avakirina paşerojek pir bihêz û biqewet deynin holê.”
Komîsyon wê hefteya bê rêxistinên ciwanan û jinan guhdar bike.
