Gerîlayên Yekîneyên Parastina Rojhilatê Kurdistanê (YRK), Hêzên Parastina Jinan (HPJ) û endamên Partiya Jiyana Azad a Kurdistanê (PJAK) û Komelgeha Jinên Azad ên Rojhilatê Kurdistanê (KJAR) 22’yemîn salvegera damezrandina PJAK’ê û 77’emîn rojbûna Rêber Apo, bi çalakiyek pîroz kirin.
Piştî merasîma leşkerî Hevseroka PJAK’ê Peyman Viyan axivî û diyar kir ku partiya wan, li ser bingeha ramanên Rêber Apo hatiye damezrandin û got ku azadî û ji nû ve vejîna gelê Rojhilatê Kurdistanê temsîl dike. Peyman Viyan, destnîşan kir ku têkoşîna wan li seranserê Rojhilatê Kurdistanê û Îranê belav bûye.
‘PJAK JI HER DEMÊ BI HÊZTIR E’
Peyman Viyan, anî ziman ku têkoşîna PJAK’ê niha li seranserê Îranê belav bûye û got ku ji ber vê bala tevahiya cîhanê li ser partiya wan PJAK’ê ye. Peyman Viyan got, “Ramanên Rêber Apo rihek xurt daye gelê Rojhilatê Kurdistanê. Îro jî her kes şêwaza têkoşîn, rêxistinbûn û hêza PJAK’ê dişopîne. Ji ber vê tirsa rejîma Îranê ya herî mezin hêz û rêxistinbûna gel e.”
Peyman Viyan, behsa şerê Îsraîl-DYE û Îranê kir û diyar kir ku têkoşîna gel di têkbirina rejîmê de bi bandor bûye. Peyman Viyan, got ku mijara herî girîng di vê pêvajoyê de misogerkirina mafên gelê Rojhilatê Kurdistanê ye. Peyman Viyan, diyar kir ku PJAK amade ye ku gel biparêze û rêxistin bike.
‘EM BER BI QONAXEKE NÛ YA TÊKOŞÎN Û SERKEFTINÊ VE DIÇIN’
Peyman Viyan, da xuyakirin ku ew ê di her şert û mercî de li kêleka gel bisekinin û amadekariyên wan berdewam dikin. Her wiha, dest nîşan kir ku armanc ew e ku Kurdistan di nav Îraneke azad û demokratîk de xwe birêve bibe.
Peyman Viyan, da zanîn ku kesên ku di warên siyasî, civakî û parastinê de amade bin, dê serkeftinê bi dest bixin û destnîşankir ku pêwîstiya rêxistinkirina gel heye.
Peyman Viyan, diyar kir ku hêzên YRK û HPJ’ê amade ne ku di her şert û mercî de parastina gel bikin û got ku ew derbasî qonaxeke nû ya têkoşîn û serkeftinê dibin.
Piştre gerîlayên azadiyê bi coşeke mezin pîrozbahiya xwe dewam kirin. Komek gerîla stran gotin û piştre koma folklorê hunera xwe pêşkêş kirin.
Pîrozbahî bi dirûşmeyên “Bijî Serok Apo”, “Bi can bi xwîn em bi te re ne ey Serok”, “Bê Serok Jiyan Nabe” û “Jin Jiyan Azadî” bidawî bû.
