9’ê Cotmeha 1998 li hemberî Rêber Apo bi serkêşiya DYE û hêzên hegemon Komploya Navneteweyî dest pê kiribû. 15’ê Sibata 1999’an Rêber Apo li Naîrobî hatibû girtin û radestî dewleta Tirk hatibû kirin.
Gerîlayên Hêzên Parastina Jinên Rojhilatê Kurdistan (HPJ) li ser salvegera 27’emîn ya Komploya Navneteweyî ku 9’ê Cotmeha 1998’an li hemberî Rêber Apo destpê kiribû, ji ANF’ê re axivîn.
Gerîlaya HPJ’ê Rojhat Çilçeme di serî de Rêber Apo bi hurmet û hezkirin silav kir û got; “Rêber Apo 1978’an dest bi şerê azadiya gelê Kurd kir. Rêber Apo zanîbû ku Kurd û Kurdistan bindest e, hatiye dagirkirin û li dijî wê qirkirin dihat kirin, ji ber vê dest bi şerê azadiya Kurdistanê kir. Gelê Kurd gihîştibû wê astê ku ne nasnameya xwe ne jî tiştekî xwe hebû. Xwe jî nas nedikir. Rêber Apo ji ber vê bi têkoşîna xwe da nîşandan ku gelê Kurd ji bo welatê xwe dikare şer bike. Têkoşîna Rêber Apo bandorekî mezin li dijî pergala sermayedarî kiribû. Ji ber vê hêzên kûrewî li hemberî Rêber Apo û têkoşîna gelê Kurd Komploya Navneteweyî pêş xist. Bêguman komloya ku hate pêşxistin, li hemberî têkoşîna me û têkoşîna Rêber Apo nekarî astengî çêbike. Komplo bi têkoşîna Rêber Apo û gelê Kurd re vala hate derxistin. Rêber Apo 26 sal in li Girava Îmraliyê têkoşînekî bêhempa dide meşandin û em jî li ser xeta Rêber Apo li ber xwe didin û têdikoşin.”
‘EVÎNA RÊBER APO EVÎNA GELÊ XWE Û WELATÊ XWE BÛ’
Gerîla Rojhat di berdewamiya axaftina xwe de behsa hezkirina Rêber Apo ya gelê xwe û welatê xwe jî kir û got; “Evîna Rêber Apo ji bo gelê xwe û welatê xwe bû. Ji ber evîna xwe heta niha têkoşînekî mezin dike. Ew kesê ku evîna gelê xwe be, evîna Kurdistan be wê her ser bikeve. Bêguman gelê Kurd jî evîna welatê xwe ye û ji bo vê her têkoşîn dike û tiştek nikare pêşiya têkoşîna wan bigre. Li ser vî esasî têkoşîna me jî li dijî dagirkeriyê û komployê wê her berdewam bike. Em ê her tim ji bo gelê xwe û azadiya xwe têbikoşin.”
Rojhat Çilçeme derbarê komployê de jî nirxandinên girîng kir û axaftina xwe wiha berdewam kir; “Her çiqas Rêber Apo li Girava Îmraliyê jî be têkoşîna xwe hîn zêdetir dike. Têkoşîna Rêber Apo û têkoşîna me ya hevpar heta astekî tecrîda girankirî şikandiye. Rast e, weşandina wêne, dîmenê Rêbertî û hevdîtin berdewam e. Lê ev têr nake, ev ne bes e. Heta ku Rêber Apo ji zindana Îmraliyê dernekeve û azad nebe komplo jî tecrîd jî berdewam e. Ger Rêber Apo ne li kêleka me be, ne di nava gelê xwe de be, negihîje şert û mercên azad em wek gerîlayên azadiya Kurdistan, têkoşîna xwe ya azadî û demokrasî bilind bikin.”
‘DÎTINA RÊBERTÎ HÊZ DA TÊKOŞÎNA ME’
Gerîlaya HPJ’ê di dawiya axaftina xwe de hestê xwe li ser dîtina Rêber Apo jî parve kir û got; “Piştî 26 sal şûnde dîmenê Rêber Apo derket. Ev kefxweşî û moralekî pir mezin bû ji bo gerîlayan û gelê me. Me hêzekî pir mezin jê girt. Hêz li ser hêz da têkoşîna me. Kêliya ku min dîmenê Rêber Apo dît, hestekî ku min nekarî pênase bikim jiyan kir. Wê demê min got, ‘Xwezî bibûma kevokekî û li ser Girava Îmralî yê firîbûma û min ji dijmin re bigota; Rêber Apo ti carî bin nakeve, her dem bi ser dikeve”. Dibe ku bi fîzîkî di zindanê de be lê di rih, îradê û fikir de azad e. Em jî li ser vê bingehê têkoşîn dikin û li ber xwe didin. Bi rastî jî bi dîmen dîtina Rêber Apo têr nake, pêwîst e bi fîzîkî di nava me de be. Rêbertî mifteya azadiya Kurdistan e. Azadiya Rêbertî azadiya Kurdistan e. Demarê hezaran Kurd girêdayî dilê Rêber Apo ye. Ger ev demar qut bibe, bê Serok jiyan nabe. Bijî Serok Apo.”
‘RÊBER APO KESAYETEKÎ NETEWÎ YE’
Gerîlaya HPJ’ê Zîlan Serdeşt jî destpêkê qala têkoşîna Rêber Apo kir û wiha axivî; “Di serî de silav û hurmeta xwe ji bo Rêber Apo dişînim. Têkoşîna ku Rêber Apo bi hevalên xwe re ji Riha heta Amed ji bo azadiya Kurdistan dest pê kir, bi xwe re encamên dîrokî derxist holê. Têkoşîna destpêkê zor û zehmetiyên pir giran re rû bi rû ma. Rêber Apo xwest gelê Kurd ku navê xwe ji bîr kiribû, ji azadiya xwe bêpar mabû biguherîne û fikrek, jinek û welatek azadîxwaz pêş bixe. Ji ber van sedeman hemû tişt da berçavê xwe û fikrê xwe belavê hemû cîhanê kir. Niha gelek welat, kom û kesayet beşdarê vê fikrê dibin û li ser xebat dikin. Rêber Apo heta 1999’an jî li hemberî dagirkeriya pergalê fikir û felsefeya xwe bi hêz kir û naveroka wê dagirt. Armanca Rêbertî ew bû ku li hemberî berhema pergala kujer welatekî û fikrekî azad ava bike. Ji ber vê sedemê dewlet û hêzên kûrewî li hemberî Rêber Apo zextekî mezin kirin û Komploya Navneteweyî dan destpêkirin.”
‘ARMANCA KOMPLO TECRÎDKIRINA GELÊ KURD BÛ’
Gerîla Zîlan Serdeşt di berdewamiya axaftina xwe de behsa komployê jî kir û wiha got; “Hêzên hegemonya dîtin ku hêza Rêber Apo li herêmê xurt e, komplo dan dest pê kirin. Xwestin Rêbertî bixin zindanê û gelê Kurd tecrîd bikin. Dibe ku Rêbertî niha li Girava Îmraliyê de be, lê hêz û felsefeya Rêber Apo li gorî berê hîn zêdetir bûye û dewlet jî nikare pêşiya vê hêzê bigire. Dibe ku Rêbertî niha tenê ye lê, Rêbertî wekî ku hezar kes gel wê ye, wekî ku hevalê wê gel wê ye jiyan dike. Rojekî xwe ji me qut nekir. Ev jî ji bo me û gelê me hêz û moralekî mezin dide. Desthilatdariya dewletan dixwazin me bê Rêbertî bihêlin. Li ser vê esasî her çar parçeyên Kurdistanê li hemberî gelê me zext û zordarî, sêdare û siyaseta tunekirinê heye. Lê, ne em ne gelê me û ne jî tevgera me vê tiştê qebûl kir. Berovajî wê, hewildan bi Rêbertî re jiyan bikin. Şer kirin, meş kirin û ketin gireva birçîbûnê û hwd. her cure çalakî kirin. Herî dawî li Rojhilatê Kurdistanê bi dirûşma Jin Jiyan Azadî serhildanekî dest pê kir. Li Rojhilatê Kurdistan fikir û felsefeya Rêbertî hate naskirin û lêgerîna azadiya xwe di Rêbertî de dibînin. Êdî herkes Rêbertî nas dike. Ji ber vê çendê ji aliyê herkesî ve ev komplo nehate qebûlkirin. Em dikarin bêjin ku berxwedana Rêber Apo û gelê me komplo vala derxist.”
‘DÎTINA RÊBERTÎ CIHÊ KEFXWEŞÎ Û KELACANÎ YE’
Zîlan Serdeşt herî dawî dîtina bi dîmen a Rêber Apo jî hestê xwe wiha parve kir; “Dîtina Rêbertî ji bo hevalê me, gelê me û tevgera me moral û kelacanekî mezin da. Dewlet çiqas hewil bide, me bê Rêbertî bihêle jî, êrîş ser me da bîne jî, em ê ji rih û fikra Rêbertî qut nebin, em ê her bi Rêbertî re jiyan bikin. Bila vê heqîqetê baş bizanibin. Rêbertî kesayetekî pir aliye û netewî ye. Hêz û enerjiya xwe bi fikrê xwe digre û gelê xwe digre. Rêbertî heta niha qet neketiye wê nekeve jî. Êdî fikir û felsefeya xwe belavê cîhanê kiriye. Em ê jî hewil bidin ked bidin da ku fikir û felsefeya Rêber Apo bigihîje armanca xwe. Ji ber vê çendê carekî din ez bi dîtina Rêbertî pir kêfxweş bûm. Ji nirxandin û tevgera rûyê wê pir bandor bûm. Rêbertî heman demê silavê xwe ji bo gelê Ezîdî û gelên dîtir re şand. Rêbertî xwe ji nasnameya Êzidî qut nekir, eşa wan xwest parve bike. Em ji vê tiştê pir bandor bûn. Wek gerîlaya azadiya Kurdistanê em jî êşa gelê Êzidî parve dikin û xwe tê de dibînin.”
