Li qada navbera taxên Eskar û Beyrok ên li ber Çiyayê Dorşîn a li navçeya Pasûr a Amedê, ji aliyê cerdevan û hin gundiyan ve qirkirina daran didome. Ev der qada daristanî ya herî girîng a navçeyê ye. Bi hinceta ewlekariyê, ketin û derketin girtî ne.
Bêdengiya li dijî vê qirkirina ku bi navê ciwankirina daristanê tê kirin, bû sedemê nerazîbûna xelkê herêmê. Welatiyekî ku nexwest navê xwe bide, wiha got, “Li dijî birîna daran a li Eskar û Beyrokê çima siyasetmedar û ekolojîst tiştekê nakin. Çaya Pasûrê hate tunekirin, Hesendîn tê tunekirin. Dorşîn jî ku ji bo navçeya me depoya oksîjenê ya herî girîng e, tê tunekirin. Çima li hemberî vê yekê bêdengî heye?”
