Serokwekîla Koma DEM Partiyê Gulistan Kiliç Koçyîgît di civîna çapemeniyê de ya li Meclîsê rojev nirxand. Beşên ku ji axaftina Koçyîgît derketine pêş, wiha ne:
“Meşa Azadiyê ya ku me 1’ê Sibatê ji baskan ve dayî destpêkirin, îro di roja 12’an de ye. Helbet ev meş ji bo şikandina tecrîdê û pêkanîna azadiya fîzîkî ya Rêber Apo ye. Ev meş di heman demê de ji bo pêkanîna edalet û aştiyê ye jî. Em ne tenê behsa azadiya Birêz Ocalan dikin, em behsa azadiya hemû gelên Tirkiyeyê û gelê Kurd dikin.
Azadiya Birêz Ocalan wê bibe gava destpêkê ya çareseriya pirsgirêka Kurd û demokratîkbûna Tirkiyeyê. Ev meş di heman demê de ji bo naskirina mafên siyasî û çandî yê gelê Kurd û garantîkirina mafê welatîbûnê ya makeqanûnê ye. Ji bo ev daxwaz hemû pêk bên, divê tecrîd bê rakirin û azadiya fîzîkî ya Birêz Ocalan pêk bê. Li gel vê jî ji bo pirsgirêka Kurd bi rêyên demokratîk û aştiyane bê çareserkirin, divê maseya muzakereyê jî bê danîn. Divê Birêz Ocalan weke muxatabê vê pirsgirêkê bê naskirin.
Baskê me yê Qersê çûye nêzî 5 bajar û 17 navçeyan. Îro wê li Êlih û Bismîlê be. Baskê Wanê jî çûye 4 bajar û 13 naveçeyan. Li vir bi coşeke mezin hatin pêşwazîkirin. Îro wê li Mazidag û Çinarê bin. Di 13’ê mehê de her du baskên me wê li Amedê bên ba hev û di 15’ê mehê de li Amarayê fînalê bikin. Em ji vir Meşa Azadiyê silav dikin. Divê hemû raya giştî, sazî û desthilatdarî deng bidin vê meşê.
Berpirsyariya Meclîsê heye ku mafê zimanê dayikê yê 20 milyon Kurdên li vî welatî dijîn, biparêze.”
