Serokwekîla Koma DEM Partiyê Gulîstan Kiliç Koçyîgît, di çarçoveya “Hevdîtinên Aştî û Civaka Demokratîk” de, li Eskîşehîrê li Komaleya Agiriyê bi gel re civiya. Endamên meclîsê yên AKP û CHP’ê jî tevlî civînê bûn.
Gulîstan Kiliç Koçyîgît têkildarî qonaxa heyî ya pêvajoya aştiyê nirxandinan kir û destnîşan kir ku meseleya Kurd pirsgirêkekî nasnameyî ya dîrokî ye. Koçyîgît wiha got, “Ev ne meseleya teror an jî ewlehiyê ye, pirsgirêkekî nasnameyî ya dîrokî ye ku kokê wê digihe înkar û îmhayê.”
‘SERDANA ÎMRALIYÊ PÊPINGA KRÎTÎK DERBAS KIRIYE’
Gulîstan Kiliç Koçyîgît bal kişand ser hevdîtina komîsyona ku li meclîsê ji bo çareseriya pirsgirêka Kurd hatiye avakirin, di 24’ê Mijdarê de bi Rêber Apo re û diyar kir ku ev serdan di aliyê psîkolojîk û siyasî de pêpingekî girîng e.
Gulîstan Kiliç Koçyîgît ragihand ku Rêber Apo di hevdîtinê de wiha gotiye, “Em bi dewletê re gihiştibûn mitabeqetê, lê niha mitebeqeta siyasî digerin. Ez şandeya ku hatî wekî şandeya siyasî qebûl dikim. Ev hevdîtinek dîrokî ye.”
Koçyîgît wiha got, “Em li gorî duhî di qonaxekî zêdetir bi hêvî û biryardar de ne. Çekberdana PKK’ê ji bo ku şer bi temamî ji jiyana me derkeve, pir krîtîk e. Lê ji bo avakirina aştiyê, berpirsyariya me ya civakî heye.”
‘DIVÊ GEL XWEDÎ LI VÊ PÊVAJOYÊ DERKEVIN’
Gulîstan Kiliç Koçyîgît destnîşan kir ku divê pêvajo bi tenê ji partiyên siyasî re neyê hiştin. Koçyîgît îşaret bi pêvajoya çareseriyê ya 2013-2015’an kir û wiha got, “Ger dema îhtîmala bi ser neketina aştiyê çêbû, bi milyonan mirov derketiban qadan, pêvajo wisa bi dawî nedibû. Divê em îro bi heman berpirsyariyê tevbigerin.”
‘VERASTKIRINA QANÛNÎ YA JI BO VEGERA KESÊN ÇEK BERDANE ŞERT E’
Koçyîgît, diyar kir ku pêvajo piştî banga Rêber Apo pêş ketiye û got ku divê Meclîsê tişta ku dikeve ser milê wî bike û wiha dirêjî da axaftina xwe, “Niha divê aliyê din, ango em, Meclîs û siyaset berpirsyariya xwe bi cih bîne û bi awayekî lez qanûnên vê pêvajoyê derxin. Di 11’ê Tîrmehê de çek berdan, lê nekarîn werin, ji ber ku qanûnek tune ye. Divê qanûnên azadiyê ku vegera kesên çek berdane pêk bîne, were derxistin. Divê qanûnên tevlîbûna li jiyana civakî û siyasî, bi awayekî lez ji aliyê Meclîsê ve were kirin.”
Gulîstan Kiliç Koçyîgît destnîşan kir ku dijberiya AKP’ê veguheriye dijberiya pêvajoyê û wiha got, “Hîna sala 19’ê Adarê tijî nebûye. Em ji 19’ê Adarê ve vê zilmê dijîn. Em çend 19’ê Adarê vê zilmê dijîn? Ji 2016’an ve şaredariyên me, îradeya me tên desteserkirin. Maseyeke çareseriyê hate danîn, ji ber ku ev pêvajo bi rêve diçe, ne ku me hemû polîtîkayên AKP’ê pejirandiye, an jî tevlî Tifaqa Cumhur bûne. Em xeta xwe ya polîtîk û îdeolojîk dimeşînin.”
‘KURD WÊ BAWERÎ BI ÇI BÎNIN?’
Gulîstan Kiliç Koçyîgît anî ziman ku pêwîstî bi Destûra Bingehîn a nû û berfireh heye û bilêv kir ku nîqaşên ku li ser Rojava têne kirin, pêvajoyê dixitimîne. Koçyîgît herî dawî wiha got, “Li Tirkiyeyê nîqaşek pir bi pirsgirêk heye. Aliyeke ku mijara Sûriye û Rojava derdixe pêş û timî ji televîzyonan bang dike, heye. Gotinên wekî, ‘YPG divê çek deyne, ger YPG çek nedeyne pêvajo nabe’ tên kirin. Her kes ji Kurdan re dibêje, ‘Werin entegre bibin.’ Wê Kurd entegreyê çi bibin? Qey li holê pergalekî demokratîk heye ku Kurd entegre nabin? Kurd wê baweriya xwe bi çi bînin. Ger sibê êrîşî mala Kurdan bikin, êrîşê milkê wan bikin, êrîşa wan bikin, ger bixwazin komkujiya ku ji Elewî û Durziyan re hat kirin ji Kurdan re bikin wê çi bibe mîsogeriya Kurdan?”
