Konseya Giştî ya Tevgera Şoreşê ya Yekbûyî ya Gelan (HBDH) nirxandina siyasî û leşkerî ya sala 2024’an kir.
Di destpêka nirxandinê de hate gotin, “Kêliya dîrokî ya ku em di nav de ne kêliyeke welê ye ku ‘alarma şewatê’ li hemû corafyayên cîhanê bi taybetî jî li xaka Sûriye û Bakur-Rojhilatê Sûriyeyê lê dide. Şerê dagirkerî, talan û qirkirinê yê çeteyên HTŞ-SMO’yê ku rojên dawî yên sala 2024’an gelên Sûriyeyê pê re rû bi rû man û DYE-NATO-Îsraîl û Tirkiye piştgiriya wan dike, encameke ji şerê li ser zemîna Rojhilata Navîn û Ûkraynayê ye. Em li cîhaneke welê ne ku têkoşîna hegemonyayê ya navbera hêzên kapîtalîst emperyalîst êdî bêyî şer nema dikare bê meşandin.
Em di demeke welê de ne ku di serî de Tirkiye û Îsraîl dewletên herêmî û hêzên wekîl ên wan ên paşverû gelên Rojhilata Navîn bi felaketên giran re rû bi rû hiştine, di şerê qirkirinê re derbas kirine, ji cih û warê xwe kirine. Vê yekê jî careke din nîşan da ku têkoşîna şoreşê ya yekbûyî ya gelan ji bo jinan û hemû bindestan gelekî girîng û pêwîst e. Di vê kêliya dîrokî de ku mirovahî, di nava şerê parvekirinê yê emperyalîst de ne, rêyên ‘ya sosyalîzm ya jî barbarî’ weke dirûşmekê namîne, bi şênberî hebûna xwe nîşan dide.”
‘EM Ê JIYANA NÛ YA LI ROJHILATA NAVÎN ŞÎN BÛYE, ŞOREŞA ROJAVA BIPARÊZIN’
Konseya Giştî ya HBDH’ê destnîşan kir ku Şoreşa Rojava ji kêliya ku ava bû û pê ve li nava derya xwînê ya Rojhilata Navîn hewl da hêvî û îradeya jinan û gelan a ji bo xweparastin û rêveberiyê ya azad û wekhev, bi fedakariyeke mezin biparêze û got, “Dewleta Tirk a faşîst vê hebûna Şoreşa Rojava li hemberî serwerî û mayindebûna xwe weke gefekê dît û ji xwe re kir armanc ku wê tine bike. Desthilatdariya faşîst a ku bi armanca Neo-Osmaniyê bi rê ket, di heman demê de ji bo pêkanîna xeyalên xwe yên Mîsakî Mîlî êrîşî Rêveberiya Xweser a Bakur û Rojhilatê Sûriyeyê dike.
Li dijî Şoreşa Rojava û gelan, her cûre çeteyên olperest-neteweperest ji aliyê dewleta Tirk a faşîst ve têne birêxistinkirin û hewl dide li Bakur û Rojhilatê Sûriyeyê atmosfereke şerê navxweyî yê li dijî şoreşê ava bike.”
Di dewama daxuyaniyê de hate ragihandin ku dewleta Tirk bi vê nêzîkatiya xwe di paşeroj û avakirina Sûriyeyê de nîşan dide ku nikare xwe li hêvî û îradeya xwerêveberî û xweparastinê, jiyana wekhev û azad a gelan rabigire û hate gotin, “Dewleta Tirk a faşîst dixwaze Rojava teslîm bigire û bifetisîne. Çav berdaye şoreşa jinê ya Rojava ku ne tenê ji bo herêmê, her wiha ji bo hemû jinên cîhanê bûye hêvî û berxwedêrî. Tinekirina şoreşa jinê ya Rojava armanca hemû hêzên paşverû ye.”
Konseya Giştî ya HBDH’ê diyar kir ku di serî de gelê Kurd, gelên Bakur û Rojhilatê Sûriyeyê xwedî li xaka xwe, rêveberiya xwe derkevin û got, “Ev xak dibetî û derfetên şoreşger a herêmê mezin dike. Weke hêzên şoreşger ên yekbûyî em ê jî vê xakê, şoreşa xwe li her qadê û li her eniyê, bi her rê û rêbazên têkoşînê biparêzin.”
‘EM Ê BI HEV RE BER BI ŞOREŞÊ VE BIMEŞIN!’
Di daxuyaniya Konseya Giştî ya HBDH’ê de hate gotin, divê xalên tengezar ên sala 2024’an û asta têkoşînê baş bêne nirxandin, dersên pêwîst jê bêne wergirtin û hate gotin, “Di çarçoveya van dersan de divê em têkoşîna şoreşgerî hîn xurt bikin û tundiya girseyî ya şoreşgerî bi rêxistin bikin û bi vê perspektîfê tevbigerin.
Weke tevgera şoreşê ya yekbûyî divê em tunelên ber bi şoreşê bikolin, bêrawestan, di nava dînamîkên berxwedana civakî û çînî asta milîtaniya berxwedan û têkoşînê bilind bikin. Armanca me ya ji bo dema bê ew e; hemû baskên têkoşîn û berxwedanê bigihînin hev, bi çalakiyên tudniya şoreşgerî yên pêşeng têkoşîna yekbûyî bi pêş ve bibin. Li hemberî gavên dagirkeriyê yên nû yên ku dewleta Tirk a faşîst ji bo tinekirina Şoreşa Rojava bike, divê em şoreşê di asta herî bilind de biparêzin.
Ji bo xwedîderketina li jiyan, ked û xwezaya xwe, ji bo astengkirina serwerî û zexta li ser jiyana me, li dijî desthilatdariya kuştinê em ê rahêjin çekên xwe û têkoşîna şoreşê ya yekbûyî bilind bikin. Her tiştên li ber destê xwe em ê bikin çek, em ê çekên xwe yên heyî jî hîn tund bikin. Li dijî faşîzm, serweriya mêr, dagirkerî û mêtingeriyê, yekane rêya me rêxistinî, biçekbûn û şerkirin e.”
