Di daxuyaniya Komîteya Rêveber a Tevgera Şoreşê ya Yekbûyî ya Gelan (HBDH) de berxwedêrên rojiya mirinê hate bîranîn. HBDH’ê diyar kir ku berxwedana 14’ê Tîrmehê bûye nîşaneya rûmetê ya têkoşîna li dijî mêtingeriyê.
Di daxuyaniyê de hate gotin, berxwedana girtiyên PKK’yî ya li zindana Amedê ya 14’ê Tîrmeha 1982’an li dijî darbeya faşîst a 12’ê Îlonê bû berxwedaneke dîrokî û hate destnîşankirin ku li dijî dîktatoriya faşîst, li dijî xiyanet û teslîmiyetê Kemal Pîr, M. Hayrî Dûrmûş, Akîf Yilmaz û Alî Çîçek bedena xwe kirin çeper, li ber xwe dan û şehîd bûn.
HBDH’ê got, “Li hemberî êşkence û êrîşên ji bo teslîmgirtinê yên dîktatoriya faşîst, 14’ê Tîrmehê di heman demê de berxwedana li hemberî qirkirin û mêtingeriyê ye ku li ser gelê Kurd dihate ferzkirin.
Berxwedana 14’ê Tîrmeha 1982’an li hemberî mêtingerî û faşîzmê hêzeke mezin da têkoşîna hebûna neteweyî û azadiyê ya gelê kurd. Ev berxwedana gelê Kurd a li zindanan bilind bû li dijî mêtingeriyê bû nîşaneya rûmeta berxwedanê.
Xwedîderketina li biryardarî û ruhê berxwedanê yê 14’ê Tîrmehê îro jî di têkoşîn û berxwedana li dijî faşîzm û mêtingeriyê de rê nîşan dide.”
Di daxuyaniyê de cangoriyên Rojiya Mirinê û Greva Birçîbûnê ya Bêdem a 20’ê Gulana “1996’an Aygün Uğur, Hüseyin Demircioğlu, Ayçe İdil Erkmen, Ali Ayata, Müjdat Yanat, Hayati Can, Altan Berdan Kerimgiller, Tahsin Yılmaz, Osman Akgün, Ulaş Hicabi Küçük, İlgiç Özkeskin û Yemliha Kaya hatin bîranîn.
HBDH’ê diyar kir ku şehadeta 12 şoreşgeran kevneşopiya berxwedanê û têkoşînê ya girîng di nava têkoşîna azadî û sosyalîzmê de afirandiye.
Di dawiya daxuyaniyê de bang li kedkar, ciwan, jin, pêşverûyên li Tirkiye û Bakurê Kurdistanê hate kirin ku têkoşîna şoreşgerî ya li dijî faşîzmê mezin bikin, bibin dengê girtiyên siyasî, ji bo tedawiya di nava şert û mercên mirovî de ya girtiyên nexweş têkoşînê mezin bikin, hesab ji faşîzmê bixwazin û ji bo vê jî yekîtî, rêxistinbûna xwe pêk bîne.
