Hêzên Ewlekariya Hundirîn –Helebê der barê îdiayên ku dibêjin aramî heye daxuyaniyek weşand.
Di daxuyaniyê de hate diyarkirin ku ev îdia ne rast in, di çarçoveya xapandina raya giştî de têne belavkirin.
Hate gotin, armanc ji belvakirina van îdiayan nixumandina êrişên çeteyên hikumeta demkî ya Sûriyeyê yên li ser taxên Şêxmeqsûd, Eşrefiyê û Benî Zêd ne.
Di dewama daxuyaniyê de hate ragihandin ku tevahî hewldanên aramkirinê têk çûn, sedema vê yekê ew e ku çete di rageşiya leşkerî de bi israr in.
Di daxuyaniyê de hate gotin, êriş û tevgera dronan li ser taxên şêniyan dewam dikin û amadekariyên êrişên berfireh di saetên pêş de têne kirin.
Hêzên Ewlekariya Hundirîn-Heleb di berdewama daxuyaniyê de da zanîn ku êrişkaran bi tank û panzêran 4 êriş li pey hev pêk anîn û Hêzên Ewlekariya Hundirîn bi desteka şêniyên ku malên xwe diparêzin bersiv dan.
Hêzên Ewlekariya Hundirîn-Helebê daxuyand ku şêniyên Şêxmeqsûd û Eşrefiyê bi malên xwe ve girêdayî ne û hemû cûreyên koçberiya bi darê zorê red dikin. Her wiha îşaret pê kir ku îradeya berxwedanê ji êriş, dorpêç û gefa bi hêzê xurtir e û ezmûnên dijwar ên berê jî vê yekê piştrast dikin.
Hêzên Ewlekariya Hundirîn-Helebê di dawiya daxuyaniyê de hişyarî da ku hewlên ferzkirina rewşên nû yên leşkerî bi rêya rageşiya meydanî û dezenformasyona medyayî dê encamên xirab bi xwe re bîne ku aliyên êrişkar jê berpirsyar in.
