Fermandariya Giştî ya Hêzên Parastina Jinê yên Rojhilatê Kurdistanê (HPJ) ku hêza xweparastinê ya jinê ya Rojhilatê Kurdistanê ye, bi wesîleya 25’ê Mijdarê Roja Têkoşînê ya Navneteweyî ya li dijî Tundiya li Jinê daxuyaniyek weşand.
Daxuyanî bi vî rengî ye:
“Beriya her tiştî em vê rojê ku weke roja komkujî û tundiya li hemberî jinê tê bîranîn, şermezar dikin. Di heman demê de bi ruhê şoreşa Jin, Jiyan, Azadî em asta xwe ya parastina felsefeya xwe ya azadiyê, berpirsyariya xwe ya bingehîn a bi nirxên civakê re bûye yek, destnîşan dikin.
Weke Hêza Xweparastinê ya Jinê li hemberî her cûre êriş û tundiya li hemberî jinê em ê hem hêza xwe ya parastinê mezin bikin, hem jî xurt bikin. Ji bo vê jî her jinek, li ku dibe bila bibe divê xwedî li nirxên xwe yên dîrokî derkeve, li hemberî hilweşîneriya mejiyê bi serweriya mêr di felsefeya xweparastinê de sekneke qewîn nîşan bide û vê hişmendiyê ji xwe re bike rêber. Weke ku Rêber Apo dibêje, ‘Li hemberî neheqî û êrişên heyî yên li dijî jinê tenê çekek heye, ew jî ew e ku jin bi xwe zanibe’.
Jin ji dîrokê û vir ve xwedî rabirdûyeke mezin û hişmendiyeke xurt a nirxên xwe ye; bi saya vê yekê dikare hem xwe biparêze, hem jî hînî hinekî din bike. Li dijî tundî, kuştin û destavêtinê mafê jinê heye ku xwe biparêze. Lewma divê jin hemû bikevin nava lêgerîna vegera li cewhera xwe. Vegera li cewhera xwe wê bike ku jin karibe li hemberî kujerên êrişkar çeka xwe ya herî mezin bi kar bîne. Em weke hêza parastina hemû jinan, li ku dibe bila bibe li pêşberî qîrîna her jinê xwe berpirsyar dibînin û dengê wan dibihîzin. Ji bo me ti carî nebûye pîvan ku parastina jinê li gorî qewm, bawerî an jî çanda wê bê kirin; pîvana me ew e ku li ku dibe bila bibe hemû jinan ji her cûre êrişan biparêze.
Li ser vê bingehê, weke hêza parastinê ya hemû jinan em ê tola êşa bi salan a Aryen, Barîn, Viyan, Ronahî (Andrea Wolf), Rojbîn Ereb û Emîne Erciyesan hilînin. Bi saya van hevrêyên ku di vê rêyê de têkoşiyan, em ê di çarçoveya zanista jinê ya azad de paradîgmaya demokrasiya civakî ava bikin. Di vê çarçoveyê de em bang li jinan hemûyan dikin: Bi berpirsyariya parastina mafên xwe yên civakî û nirxên xwe rabin û li refên herî pêş beşdarî vê têkoşînê bibin. Bi rêya vê têkoşîna ku em ê bi ser bixînin, em ê aştî û civaka demokratîk ava bikin ku yekane rêya jiyana azad û wekhev e.”
