Tevgera Çand û Hunera Demokratîk a Mezopotamyayê (TEV-ÇAND), Tevgera Çanda Jinên Hîlala Zêrîn, Desteya Çand û Ronakbîriyê ya Kantona Cizîrê, Meclisa Wêje û Yekitiya Hunermendan ji bo rewşa seferberiyê ya ku li hember êrişên komên çete yên girêdayî hikumeta demkî ya Sûriyeyê daxuyaniyek da.
Daxuyanî li ber Navenda Çand û Hunerê ya Mihemed Şêxo ya bajarê Qamişlo bi tevlêbûna hunermend, rewşenbîr, wêjevan û helbestvanên li Rojavayê Kurdistanê, her wiha bi amadebûna nûnerên ji Meclisa Rêveber a Rêveberiya Xweser a Demokratîk a Kantona Cizîrê hate dayîn. Daxuyanî ji aliyê hevserokê TEV-ÇAND`ê Xelîl Tehlo ve hate xwendin.
Di daxuyaniyê de hate diyarkirin ku li herêma wan gel rastî êrişên qirkirinê tên, xaka wan bi berdêlên giranbuha, bi hezaran şehîdan hatiye azadkirin û wiha hate gotin: “Ji azadiyê birûmettir tiştek nîn e. Bila dewleta Tirk a faşîst û çeteyê wê, HTŞ û çeteyên wê baş bizanin ku em tu carî bêrûmetiyê qebûl nakin û dev ji azadiya gelê xwe bernadin. Li hember hemû êrişên hovane û qirker, em ê wek hunermend û xebatkarên çand û hunerê heta dawiyê axa xwe, bajarên xwe biparêzin.”
Hate destnîşankirin ku hunermend di heman demê de şervanên gelê xwe ne, heta niha bi stran û govend, bi şano, sînema, wêne û hemû hunera xwe çawa ew di xizmeta gelê xwe de bûn, îro jî bi çeka xwe û bi hemû hêza xwe ew ê gelê xwe biparêzin.
Hate diyarkirin ku biryara seferberiyê hatiye ragihandin û wiha hate gotin: “Em bangî hemû gelê xwe dikin, her kes rahêje çekên xwe û her tax, her kolan û her malê bikin sengerekî şer. Heta em vî dijminî bi şer û berxwedaneke serkeftî neşikînin nasekine. Îro ew roja dîrokî ye ku em dikarin van êrişên qirkirinê têk bibin. Em li benda tu hêzên durû û zalim yên navneteweyî nemînin ku piştevaniyê bikin. Ev plan û komplo bi destê wan hatine çêkirin. Tu bangewaziya me ji van hêzên ku di nava van êrişên qirkirinê de cih digirin tune ye. Em ê qedera xwe bi berxwedan û îradeya xwe teqez bikin. Em ê pêşerojeke azad bi destê xwe ava bikin. Em hemû li dora YPG, YPJ, HPC û QSD’ê bibin yek. Xweparastin maf û erka me ye. Em bi bawer in ku dest bidin hev û li ber xwe bidin, teqez serkeftin dê ya me be.”
