Televîzyona El-Masirah a serhildêrên Hûsî yên li Yemenê ragihand ku roja Sêşemê êrîşeke hewayî li ser Bendergeha Hudeyde ya li rojavayê Yemenê hatiye kirin. Di daxuyaniyê de hate ragihandin ku Îsraîlê bi du fezeyan li bendergehê xistiye.
Ev êriş heman piştî hişyariya artêşa Îsraîlê ya êvara Duşemê hate kirin ku bang kir ku sê bendergehên Yemenê bêne valakirin. Berdevkê artêşa Îsraîlê Avichay Adraee diyar kir ku bendergeh ji aliyê hêzên Hûsî ve bi ‘armancên terorîstî’ têne bikaranîn û ji sivîlên li bendergehên Ras Îsa, Hudeyde û El Salifê xwestibû, tavilê herêmê biterikînin.
Hûsiyên ku Îran piştgiriya wan dike, ji 7’ê Cotmeha 2023’an dema destpêkirina şerê Xezeyê û vir ve bi fuze û balafirên bêmirov êrîşî Îsraîlê dikin. Piraniya êrîşan ji aliyê sîstemên parastinê Yên Îsraîlê ve têne bêbandorkirin.
Hûsî her wiha êrîşê dibin ser keştiyên bazirganiyê ku difikirin pêwendiya xwe bi Îsraîlê re hene. Ev êrîşên li peravên Derya Sor û Yemenê gefeke mezin li bazirganiya deryayî ya li herêmê dixwe.
Fuzeyek ku 4’ê Gulanê ji aliyê Hûsiyan ve hate avêtin li derdora Balafirgeha Ben Gurion a li nêzî Tel Avîvê ket û bû sedema hin birîndarî û xisara madî.
Artêşa Îsraîlê mehên dawî gelek caran ji hewayê êrîş bir ser herêmên di bin kontrola Hûsiyan de ne. Di van êrîşan de bendergeh û balafirgeha li paytexta Yemen Sanayê, binesaziyên krîtîk hatin bombekirin.
Rageşiya li herêmê bi êrîşên aktorên nêzî Îranê û Îsraîlê hîn zêde dibe. Rêyên bazirganiyê yên Derya Sor û ewlekariya herêmî hîn jî di bin gefê de ne.
