Navenda Mafên Jinan a Baroya Wanê, têkildarî mirina bi guman a Rojîn Kabaîşê daxuyaniyeke hevpar a bi îmzeya baroyên Wan, Amed, Mêrdîn, Dîlok, Bedlîs, Şirnex, Riha, Êlih, Îdir û Mûşê da. Daxuyanî, li Eywana Konferansan a Tahir Elçî ya Baroya Wanê hate dayin. Parlamentera DEM Partiyê Gulcan Kaçmaz Sayyîgît, Hevşaredara Bajarê Mezin a Wanê Neslîhan Şedal û gelek kes tev li bûn.
Li ser navê baroyan Endama Navenda Mafên Jinan a Baroya Wanê Mariye Bîldîrîcî Borazan daxuyanî da.
Mariye Bîldîrîcî, wiha got: “Di dosyayê de bi rêya biryara sînorkirinê û ji bo ewlehiya lêpirsînê bi raya giştî re kêmek agahî hatin parvekirin. Lê di vê pêvajoyê de ewraqên ku bi hinceta biryara nepeniyê ji wekîlên miştekiyan hatin veşartin û nehatin teslîmkirin, bi rêya kanalên muxtelîf ve hatin weşandin. Her wiha Serdozgeriya Komarê ya Wanê bi heman kanalan re hevpeyvîn kir. Ev yek nîşan dide ku biryara nepeniyê tenê ji bo parêzeran hatiye cîbicîkirin. Daxwaznameyên li dosyayê hatine zêdekirin û bi xebata medyaya civakî yên demek nêz berê hat xwestin ku biryara sînorkirinê were rakirin. Rakirina biryara sînorkirinê dê bike ku kêmasiyên di dosyayê de bên tespîtkirin û çareseriyê hêsantir bike.”
Bi domdarî Mariye Bîldîrîcî da zanîn ku di rapora ATK’ê ya ewil a di dosyaya Rojîn Kabaîşê de gelek kêmasî hene û ji bo temamkirina van kêmasiyan îtîraz hatiye kirin. Mariye Bîldîrîcî, wiha domand: “Li ser îtîraz û daxwazan raporeke zêdek li dosyayê hate zêdekirin lê bersiva tu pirsan nehate dayin. Tenê beşda encamê hate guherandin û weke ku bibêjin hewce nake agahiyên nû li dosyayê bên zêdekirin. Tekane guherîna di raporê de ew bû ku gotine mayina di avê de ya Rojînê û roja windabûyî hev digirin. Nepêkan e ku rapor bi vî halê xwe were qebûlkirin. Daxwaz û îtîrazên li dijî rapora zêdek pêşkeşî dosyayê hatine kirin.
Di berdewamê de Mariye Bîldîrîc anî ziman ku medyaya nêzî îktîdarê ji roja ewil ve hewl da weke ku Rojîn Kabaîşê “întîhar” kiribe nîşan bide û wiha pê de çû: “Tevî biryara sînorkirinê ya ji bo dosyayê jî hin malper û kesayetan agahiyên bêbingeh parve kirin û me derheqê wan de serlêdanên sûc ên pêwîst kirin. Di raporên ATK’ê de bi awayekî teqez nehatiye gotin bê ka Rojînê întîhar kiriye yan qeza kiriye yan di encama cînayetê de jiyana xwe ji dest daye. Nehatiye zelalkirin bê ka bi kîjan awayî di avê de xeniqiye yan jî di aveke çawa de xeniqî ye. Di rewşekî wiha de mimkin nîne em qebûl bikin ku mirina jinekê ya bi guman bi îdiaya întîharê were veşartin. Peywira meqamên darazê ye ku rastiya mirinên wiha biguman derxînin holê.”
Mariye Bîldîrîcî diyar kir ku di bûyerên windabûnê de roja ewil pir girîng e û wiha bi dawî kir: “Tenê li ser îxtîmala întîharê sekinî ne û vê jî rê li ber xemsariyan vekiriye. Heta ku delîlên teqez dernekevin holê, em ê ji îdiaya întîharê bawer nekin û têkoşîna xwe bidomînin. Di dosyayê de hêj tu gumanbar nehatine diyarkirin, rapora kesên pispor nehatiye amadekirin, daneyên di telefona Rojînê de nehatine eşkerekirin û xwediyên mînakên DNA’yê yên li ser cenazeyê Rojînê hatine dîtin nehatine tespîtkirin. Ev kêmasî, di mijara cidiyeta lêpirsînê de rê li ber gumanên mezin vedike.”
Herî dawî jî Mariya Bîldîrîcî spasiya baroyan, rêxistinên civaka sivîl kir û got ku dê têkoşîna wan bidome.
