Gerîlayên Azadiyê yên Kurdistanê bi wesîleya Pêngava 15’ê Tebaxê ji ANF’ê re axivîn. Gerîlayan Cejna Vejînê li gelê kurd û Rêber Apo pîroz kirin û bal kişandin ser Pêvajoya Aştî û Civaka Demokratîk. Gerîlayên HPG û YJA Starê ragihandin ku ew bi saya fîşeka destpêkê ya ku 15’ê Tebaxa 1984’an hate teqandin gihîştin vê astê û gotin, ji niha û pê ve jî wê bi ruhê 15’ê Tebaxê têkoşîna azadiyê bimeşînin.
WÊ ROJÊ HIŞYARBÛN PÊK HAT
Eylem Xoşmêr: Sala 1984’an fîşeka destpêkê hate teqandin. Ji wê rojê û vir ve têkoşîneke bêhempa hate meşandin. Têkoşîna çekdarî ne tenê li çiyê hate kirin, li çar aliyên Kurdistanê belav bû. 15’ê Tebaxê ji bo me Cejna Vejînê ye. Wê rojê hişyarbûnek pêk hat. Hevrê Egîd bi fîşeka ku teqand tovên jiyaneke nû reşand. Îro hîn jî bi ruhê wê fîşeka destpêkê bi hezaran Egîd tevlî dibin. Polîtîkayên îmha û înkarê hebûn. Gelê Kurd li hemberî vê yekê xwe parast û rahişt çekê. Ev yek di nava xwezayê de jî bi vî rengî ye; hemû zindî xwe diparêzin. Hebûna têkoşîna çekdarî ji bo parastinê ye. Em hêvîdar in ku ev gav ji bo gelên cîhanê rêya azadî û serketinê veke.
DIGOTIN ‘ME KURD BINAX KIRIYE, BETON LI SER RIJANDIYE’
Armanc Wan: Pêngava 15’ê Tebaxê ji bo gelê Kurd nîşaneya hebûnê ye. 41 sal in ji bo azadiya gelê Kurd têkoşîna çekdarî tê meşandin. Bêguman ev têkoşîn ji ber xwe ve destpê nekir; li hemberî Kurdan polîtîkaya îmhayê dihate meşandin. Dagirkeran digotin, ‘Me Kurd binax kir, beton li ser rijand’. 15’ê Tebaxê li hemberî vê polîtîkaya îmhayê hate destpêkirin. Ji ber vê yekê fîşeka destpêkê girîng û dîrokî ye. Gelê Kurd bi saya wê fîşekê jinûve bi ser xwe ve hat. Lewma em dibêjin 15’ê Tebaxê Cejna Vejînê ye. Rahiştina çekê di heman demê de tê wateya parastina xwe ji komkujiyan. Gelê Kurd ji bo parastina rûmet, çand û hebûna xwe neçar ma rahêje çekê. 15’ê Tebaxê paşeroja me diyar kir. Em deyndarê vê dîrokê ne. Beriya 15’ê Tebaxê rewş cuda bû, îro rewşa gelê Kurd gelekî cuda ye. Cîhan êdî Kurdan nas dike. Niha pêvajoyek enû heye; partiya me xwe fesix kir û li hemberî dewleta Tirk têkoşîna çekdarî sekinand. Lê belê weke ku min di destpêkê de got, çek garantiya hebûna me ye. Niha paradîgmayeke nû heye, em li gorî wê tevlî dibin û ji bo serxistina vê pêvajoyê em ê têkoşîna xwe hîn bilind bikin. Em hatin tevlî Rêber Apo bibin û em ê ti carî dest ji têkoşînê bernedin. Eger li hemberî hebûna gelê me metirsî hebe, çek wê careke din bibe amûra parastinê.
WEKE JIN EM Ê HER TIM XWEDÎ LI MÎRATEYA PÊNGAVA 15’Ê TEBAXÊ DERKEVIN
Bêrîvan Mîrkan: 15’ê Tebaxê li Rêber Apo, gelê me û hevrêyên me pîroz be. Pêngava 15’ê Tebaxê ji aliyê hevrê Egîd ve hate destpêkirin. Hevrê Egîd ji bo gelê Kurd bû çavkaniya hêviyê û bi vê pêngavê re bersiv ji qîrîna li zindana Amedê re hate dayin. Kesî bawer nedikir ku şerekî bi vî rengî wê destpê bike. Hevrê Egîd da destpêkirin û ev têkoşîn hîn jî dewam dike. Weke gerîlayên azadiyê em li ser şopa hevrê Egîd dimeşin.
Gelê Kurd weke şaxê hişkbûyî yê darekê bû, mîna kulîlkeke şîn nedibû. Bi pêngava 15’ê Tebaxê re gelê Kurd got, ‘Edî em hene’. Tovên 15’ê Tebaxê li Kurdistanê şîn bû û gihîşt vê serdemê. Gelek ked û fedakarî hate kirin. Gelê Kurd xwedî li hebûna xwe derket, ji gelên cîhanê re bû mînak. Hevrêyên jin jî tevlî vê pêngavê bûn. Weke jin em ê heta dawiyê xwedî li mîrateya vê pêngavê derkevin.
WEKE EGÎD, ZÎLAN Û BÊRÎTAN EM Ê BIDIN PEY HEQÎQETÊ
Edessa Roj: Bi teqandina fîşeka destpêkê re me şoreşa xwe dan destpêkirin; bi pêşengiya hevalê Egîd têkoşîna çekdarî hate destpêkirin. Em ê heta dawiyê xwedî li mîrateya vê têkoşînê derkevin. Bi 15’ê Tebaxê re jiyaneke nû ji gelê Kurd re hate dayin. Çawa ku li gerdûnê her tişt xwe nû dike, gelê Kurd jî bi vê pêngavê re xwe nû kir. Em niha derbasî qonaxeke nû dibin; divê em fîşeka destpêkê derbasî qonaxa aştî û demokrasiyê bikin. Bi taybetî weke tevgera azadiyê em ê bi ruhê 15’ê Tebaxê her tim xwe nû bikin. Weke fermandarên xwe Egîd, Zîlan û Bêrîtan em ê bidin pey heqîqetê. Banga me li her kesî ew e ku beşdarî vê pêvajoya azadiyê bibin. Gelê me, bi taybetî jî ciwan divê vê pêvajoyê rast binirxînin û tevlî bibin.
EM Ê XWEDÎ LI NIRXÊN 15’Ê TEBAXÊ DERKEVIN
Koçerîn Cîlo: Hevalê Egîd bi pêngava 15’ê Tebaxê re rêya têkoşîneke nû vekir û bi hezaran fedaiyên vî welatî dan ser şopa wî. Ji Zîlan û Bêrîtanan heta bi Rojger û Asyayan ev xet xeta fermandar Egîd e. Weke şervanên jin em tevlî vê pêvajoyê bûn û em hîn jî têkoşînan xwe dewam dikin. Em ê heta dawiyê xwedî li nirxên 15’ê Tebaxê derkevin.
EM BI RUHÊ 15’Ê TEBAXÊ TEVLÎ PÊVAJOYÊ BIBIN
Nûda Meydana: 15’ê Tebaxê ji bo me gerîla pêngava destpêkê bû. Fîşeka destpêkê ne tenê li qada leşkerî hate teqandin, bi vî rengî nehat destpêkirin; ew fîşek hem ji aliyê îdeolojîk hem jî ji aliyê leşkerî ve li hemberî dagirkeriyê derbeke mezin bû. Teslîmiyeta ku li gelê Kurd dihate ferzkirin hate şikandin û gelê Kurd jinûve rakir ser piyan. Di dema dawî de me agahî ji Rêbertî wergirt, ev yek ji bo me bû moral û kelecaneke mezin. Weke jin em ji her demê bêhtir amade ne. Banga min li jinan hemûyan e; Em xwe li gorî banga Rêber Apo bi rêxistin bikin. Silavê Rêber Apo ji bo hebûn e. Em bi ruhê 15’ê Tebaxê tevlî pêvajoyê bibin û serketinê ava bikin.
YA KU HEVALÊ EGÎD KIR, FÊHMKIRIN Û BICIHANÎNA RÊBER APO BÛ
Nûjiyan Alman: Em di saleke gelekî cuda de ne. Hebûna gelê Kurd êdî piştrast bû. Ev yek bi saya Pêngava 15’ê Tebaxê bû. Ev berxwedan û biryardarî ji bo gelan hemûyan bû hêviya azadiyê. Gelê Kurd bi vê gavê re bû mînak. Gelek gel têkoşiyan, lê belê nekarîn bi ser bikevin; lê belê gelê Kurd bi têkoşîna xwe bû pêşeng ji azadî û demokrasiyê re. Li gel ewqas êrîşan jî Kurdan rahiştin çekê û li hemberî dagirkeriyê derketin serê çiyê. Vê yekê jî nîşan da ku em çiqasî bi rêxistin in û hêza me heye. Pêngava 15’ê Tebaxê ne tenê gotin, her wiha pratîk jî nîşan da. Hevalê Egîd bi teqandina fîşeka destpêkê re ispat kir ku gelekî nikare xwe biparêze, bi çi rengî dikare parastina hebûna xwe bike. Îro jî her kesên xweedî wijdan û exlaq divê tevlî vê pêvajoya azadiyê bibe. Çalakiya herî mezin ev e. Tişta ku hevalê Egîd kir fêhmkirina rast û bicihanîna rast a Rêber Apo bû. Ya ku dibe para me jî ev e. Li hemberî mejiyê netewe-dewletê divê manîfestoya Rêber Apo esas bê wergirtin û em li gorî vê yekê bersivê bidin çalakiya hevalê Egîd. Jin jî divê pêşengiyê ji aştî û civaka demokratîk re bikin. Yên ku herî zêde pêwîstiya xwe bi azadiyê hene em in, ji ber vê jî yên herî zêde bixebitin divê em bin.
ŞER JÎ AŞTÎ JÎ HÊZA RÊBER APO NÎŞAN DIDE
Sema Agirî: Dîrokeke şer a 41 salî, dîrokeke serketinê hate afirandin. Fîşeka destpêkê li ser bingeha ispatkirina hebûna gelê Kurd hate teqandin. Êdî kes nikare hebûna gelê Kurd bike mijara nîqaşê û înkar bike. Ev yek mîrateya 15’ê Tebaxê ye, encama ked û berdêla şehîdan e. Bi pêşengiya Rêbertî derî li azadî û demokrasiyê vebû. Hatine vê astê ne hêsan bû. Bi destpêkirina 15’ê Tebaxê re bi artêşa şehîdan bû. Hevrêyên şehîd bi fedakariya ku ji bo azadiyê kirin em gihîştin vê astê. Raperîna wan mîrateya me ye û em serbilind in ku vê yekê dimeşînin. Niha em di qonaxeke cuda de ne. Rêbertî pêşengiyê ji vê pêvajoyê re dike. Şer jî aştî jî hêza Rêber Apo nîşan dide. Em li ser şopa Rêber Apo ne. Ji bo vekirina deriyê aştiyê, ji bo mayindekirina azadiyê, ji bo pêkanîna armancên hevrêyên xwe yên şehîd çi ji destê me bê em ê bikin. Bêguman em ê xwedî li mîrateya 15’ê Tebaxê derkevin. Wateya fîşeka destpêkê çi be; îro jî karê ji bo aştî û civaka demokratîk tê meşandin bi heman wateyê ye. Em şervanên Rêber Apo ne; soza ku me dane hevrêyên xwe yên şehîd em ê bi cih bînin.
