Komîteya Koçberên Serêkaniyê berêvarê, li Parka Xwendinê ya taxa Til Hecerê ya Hesekê, ji bo nîqaşkirina pêşdeçûnên dawîn ên têkildarî dosyaya vegerê, rûniştineke diyalogê organîze kir. Hejmarek malbat, rûspiyên eşîran û kesayetên civakî yên Serêkaniyê beşdar bûn.
Di rûniştinê de, berdevka Komîteya Koçberên Serêkaniyê Zehra Îsmaîl da zanîn ku komîteyê serjimariya giştî ya xelkê koçber pêk anî, nêzî 14 hezar malbatên dixwazin vegerin Serêkaniyê qeyd kirin. Zehra destnîşan kir ku ev lîste radestî aliyên eleqedarî dosyaya vegerê û hikumeta demkî ya Sûriyeyê hatine kirin û wê piştî bidawîbûna vegera koçberên Efrînê, dest bi vegera Serêkaniyê bê kirin.
Zehra anî ziman ku komîte xebata xwe li ser asta hiqûqî û mirovî, ji bo dabînkirina vegera ewlehî û rûmet a koçberan, didomîne û bal kişand ser ku hin tedbîrên girêdayî garantiyên ewlehî û rêkeftinên vegerê hîna tên şopandin. Her wiha niha xebat li ser temamkirina gavên guncaw ên destpêkirina koma yekemîn ber bi Serêkaniyê ve tên kirin.
Di dewama axaftina xwe de Zehra got piranî malbatên ku karîn di dema borî de serdana Serêkaniyê bikin wêraniya li bajêr bûye dîtin û gotin kesên niha li bajêr in ne ji xelkê wê yê resen in û avakirina bajarê wan wê ne hêsan be, hewceyî xebat û têkoşîna berdewam e.
Di rûniştinê de nîqaşên berfireh hatin kirin. amadebûyan pirs û metirsiyên girêdayî rewşa ewlehî û garantiyên beriya vegerê kirin. Komîteyê jî diyar kir ku dê tevahî nêrîn û pêşniyaran kom bikin û aliyên berpirsî dosyaya vegerê re rakin.
