Têkildarî hevdîtina heyeta Partiya Demokrasî û Wekehviyê ya Gelan (DEM Partî) ya bi Rêber Abdullah Ocalan re, ji derdorên siyasî daxuyanî li pey hev tên.
Desteya Rêveberiya Navendî (MYK) a Partiya Herêmên Demokratîk (DBP) têkildarî mijarê daxuyaniyek weşand.
DBP’ê, bal kişand ser daxuyaniya îro têkildarî hevdîtinê hatiye kirin û wiha got: “Di mijara çareseriya pirsgirêka Kurd de em di demeke dîrokî re derbas dibin. Perspektîfa çareseriyê ya birêz Abdullah Ocalan a di vê serdemê de dîrokî ye. Weke ku wî jî aniye ziman, pêdivî bi veguherîneke demokratîk heye.”
Bi domdarî DBP’ê destnîşan kir ku veguherîneke demokratîk bi çareseriyeke demokratîk û aştiyane ya pirsgirêka Kurd pêkan e û wiha got: “Çareseriya vê pirsgirêkê ne tenê bi destê siyasetê, bi tevlibûn û alîkariya hemû dînamîkên civakî pêkan e. Di vê çarçoveyê de hewceye xwedî li îradeya çareseriyê ya birêz Abdullah Ocalan pêşkeş dike, gavên ku dê vê îradeyê xurt bikin û hemû gavên dê bi xwe re çareseriyê bînin were derketin. Ev sedsal; xwedî wê potansiyelê ye ku ji bo gelên Tirkiye, Kurdisan û Rojhilata Navîn azadî û demokrasiyê bîne. Ji bo pêşerojeke demokratîk û azad hewceye her kes bi awayekî herî xurt xwedî li van derfetan û îradeya çareseriyê derkeve. Ev, peywira me tevan a sereke ye.”
Hevserokên Giştî yên DEM Partiyê Tulay Hatîmogûllari û Tuncer Bakirhan, têkildarî daxuyaniya têkildarî hevdîtinê, li ser hesabên xwe yên medyaya dijîtal peyam dan.
Tulay Hatîmogûllari, diyar kir ku nirxandinên Abdullah Ocalan ên li Îmraliyê bangawaziyeke dîrokî ye ku dikare qedera Tirkiye û herêmê biguherînin û wiha got: “Xurtkirina tifaqa Tirk-Kurdan û destpêkirina pêvajoyeke demokratîk û aştiyane, êdî berpirsyartiyeke û nabe ku were taloqkirin. Di vê pêvajoya krîtîk de, divê hemû derdorên siyasî ji bo çareseriyê çêker nêz bibin û gavên dilwêrek biavêjin. TBMM, zemîna herî girîng a vê pêvajoyê ye. Rêya ber bi aştî, demokrasî û biratiyê ve diçe; girêdayî gavên bi hev re û bi dilwêrekî tên avêtin e. Di vê çarçoveyê de DEM Partî çi bikeve ser milê wê dê bike û bila gumana kesekî nebe ku em ê pêşniyarên çareseriyê yên erênî mezin bikin. Em di qonaxa firseneke dîrokî de ne û em dikarin bi hev re pêşerojê ronî bikin.”
Tuncer Bakirhan jî li ser hesaba xwe ya X’ê wiha got: “Nirxandinên birêz Ocalan ên li Îmraliyê di çarçoveya çareserî û aştiyê de, balê dikişîne ser berpirsyartiyeke dîrokî. Derbaskirina têkiliyên Tirk-Kurdan a li ser zemînekî demokratîk û aştiya birûmet a Tirkiyeyê. Ev bang, ne tenê pêşniyareke çareseriyê ye, di heman demê de ji bo avakirina pêşerojeke hevpar jî firsenekî dîrokî ye. Di vê pêvajoyê de berpirsyartiyeke mezin dikeve ser milê hemû derdorên siyasî û TBMM’ê. Geşedanên li Xeze û Sûriyeyê, nîşan dide ku êdî tehemûla ji bo taloqkirina çareseriyê nema ye. Em bi hev re bersivê bidin bangawaziya ji bo aştî, demokrasî û biratiyê. Ji bo Tirkiye û herêmê em di erefeya veguherîna demokratîk de ne. Dem dema aştiyeke birûmet, cisaret û ferasetê ye.”
