Denîz Kaya li ser navê girtiyên Apoyî yên li girtîgehên Kurdistan û Tirkiyeyê, ji bo Rojnamevan û Nivîskar Huseyîn Aykol ku jiyana xwe ji dest da, nameyek nivîsî.
Di nameya bi sernavê "Bi xatirê te çinarê mezin" de wiha hate gotin: "Dema em gava xwe diavêjin sala nû, em ji ber windakirina mirovê hêja Huseyin Aykol ku piştî Apê Mûsa me jê re digot 'çinarê mezin', em pir xemgîn in. Dilê me qebûl nake ku em vî şoreşger û mirovê dilpak ê ku temenê xwe diyarî sosyalizmê û biratiya gelan kiriye, winda bikin. Di serî de ji malbata wî re, ji civaka Çapemeniya Azad re û ji gelên Kurd û Tirk re sersaxiyê dixwazin.
Em girtiyên Apoyî yên di zindanan de, me her tim jê re digot ' Kekê Huseyin'; ew bi rûpela 'Goşeyê Zindanê' bi rastî jî bûbû dengê me, hevalê me û birayê me. Huseyin Aykol, çi di pêşketina Çapemeniya Azad de, çi jî di gihandina dengê me girtiyan a ji bo derve de, bû xwedî kedeke mezin. Di ragihandina êrîşên li ser gelên me û girtiyên zindanê de, cihê Kekê Huseyin pir girîng bû.
Ew bi têkoşîn û kesayetiya xwe ya berxwedêr, di dilê gelê me û girtiyan de xwedî cihekî wisa ye ku nayê dagirtin. Pênûsa wî her tim li dijî tarîtiyê bû meşaleyek û li dijî faşîzmê jî bû qada berxwedanê. Em ê baweriya wî ya bi sosyalizmê û wêrekiya wî, her dem û li her derê bidin jiyîn. Kekê Huseyin bi ked û sekna xwe mîrateyeke mezin ji bo me hişt, loma ew ê her tim bi rêzgirtin û minetdarî bê bibîranîn.
Em careke din xemgîniya xwe ya kûr tînin ziman; ji malbata wî, ji raya giştî ya çapemeniya azad û ji gelên me re sersaxiyê dixwazin. Bi xatirê te çinarê mezin, tu yê her tim di dilê me de bî."
